जळगाव : जिल्हा मध्यवर्ती सहकारी बँकेच्या पंचवार्षिक निवडणुकीच्या रणधुमाळीने आता चांगलाच वेग घेतला आहे. इच्छुक उमेदवारांकडून अर्ज खरेदी आणि ते दाखल करण्यासाठी मोठी गर्दी होत असून निवडणुकीतील राजकीय वातावरण चांगलेच तापू लागले आहे. आज दिवसभरात १९४ नामनिर्देशनपत्रांची विक्री झाली असून, दोन दिवसांत मिळून एकूण ५०८ अर्जांची विक्री झाली आहे. दरम्यान, आज विविध मतदारसंघांतून ९ उमेदवारांनी आपले अर्ज निवडणूक निर्णय अधिकाऱ्यांकडे दाखल केले.
बँकेच्या संचालक मंडळासाठी उमेदवारी अर्ज घेण्याच्या प्रक्रियेला इच्छुकांचा उत्स्फूर्त प्रतिसाद मिळत आहे. पहिल्या दिवसानंतर आज दुसऱ्या दिवशीही इच्छुकांनी अर्ज खरेदीसाठी गर्दी केली होती. आज दिवसभरात १९४ नामनिर्देशनपत्रे विकली गेली; त्यामुळे दोन दिवसांतील एकूण विक्रीचा आकडा ५०८ वर पोहोचला आहे. यावरून अनेक दिग्गज निवडणुकीच्या रिंगणात उतरण्याच्या तयारीत असल्याचे स्पष्ट होत आहे.
नामनिर्देशनपत्रे दाखल करण्याच्या प्रक्रियेत आज ९ उमेदवारांनी आपले अर्ज सादर केले. यामध्ये विद्यमान अध्यक्ष संजय मुरलीधर पवार यांच्यासह प्रमुख उमेदवारांचा समावेश आहे. काही उमेदवारांनी खबरदारी म्हणून एकापेक्षा जास्त अर्ज दाखल केले आहेत.
संजय मुरलीधर पवार (विद्यमान अध्यक्ष) : २ उमेदवारी अर्ज दाखल
मीरा नथू पाटील : महिला प्रतिनिधी मतदारसंघातून अर्ज दाखल
तिलोत्तमा रवींद्र पाटील : महिला प्रतिनिधी मतदारसंघातून अर्ज दाखल
वैशाली अमित पाटील : अर्ज दाखल
उदय मधुकर पाटील : २ उमेदवारी अर्ज दाखल
नथू दामोदर पाटील : २ उमेदवारी अर्ज दाखल
विद्यमान अध्यक्ष संजय पवार यांच्यासह इतर दिग्गजांनी अर्ज दाखल केल्यामुळे सहकार क्षेत्रातील घडामोडींना मोठा वेग आला आहे. अर्ज दाखल करण्याच्या अंतिम टप्प्यात आणखी प्रमुख नेते व पॅनलचे अधिकृत उमेदवार आपले अर्ज सादर करतील, अशी शक्यता वर्तवली जात आहे. त्यामुळे या निवडणुकीत चुरस अधिक वाढणार असल्याचे स्पष्ट दिसत आहे.
