Amalner Child Marriage Case
जळगाव : अमळनेर तालुक्यातील लाडगाव येथील १५ वर्षे ६ महिन्यांच्या अल्पवयीन मुलीशी सुमारे वर्षभरापूर्वी विवाह केल्याप्रकरणी तिच्या पतीविरुद्ध अमळनेर पोलिस ठाण्यात बलात्कारासह पॉक्सो कायद्यान्वये गुन्हा दाखल करण्यात आला आहे. आरोपीचे नाव अजय कैलास अहिरे (रा. लाडगाव, ता. अमळनेर) असे आहे.
पोलिसांकडून मिळालेल्या माहितीनुसार, पीडितेचा सुमारे वर्षभरापूर्वी भिल समाजाच्या रितीरिवाजानुसार अजय अहिरे याच्याशी विवाह झाला होता. विवाहानंतर ती पती आणि सासरच्या मंडळींसोबत राहत होती. दरम्यान, पीडिता गर्भवती झाली.
गर्भावस्थेच्या सातव्या महिन्यात ती धुळे जिल्ह्यातील धनूर (कापडणे) येथील माहेरी गेली होती. ९ ऑगस्ट २०२६ रोजी पोटदुखीचा त्रास जाणवू लागल्याने तिला उपचारासाठी धुळे येथील रुग्णालयात दाखल करण्यात आले. उपचारादरम्यान तिचे वय १५ वर्षे ६ महिने असल्याचे आधारकार्डावरून स्पष्ट झाले. त्यानंतर पोलिसांनी तिचा जबाब नोंदवून पुढील कारवाई केली.
या प्रकरणी अमळनेर पोलिस ठाण्यात बालकांचे लैंगिक अपराधांपासून संरक्षण अधिनियम (पॉक्सो) कलम ४ व ६ अन्वये गुन्हा दाखल करण्यात आला आहे. आरोपीला अद्याप अटक करण्यात आलेली नाही. या प्रकरणाचा तपास पोलीस उपनिरीक्षक नामदेव बोरकर करीत असून, प्रभारी अधिकारी पोलीस निरीक्षक दत्तात्रय निकम यांच्या मार्गदर्शनाखाली पुढील तपास सुरू आहे.
