अज्ञात वाहनाच्या धडकेत प्रौढ ठार
जळगाव : तालुक्यातील भादली ते भोकर दरम्यान अज्ञात वाहनाने जोरदार धडक दिल्याने पायी जाणाऱ्या प्रौढाचा जागीच मृत्यू झाल्याची घटना रविवारी १२ ऑक्टोबर रोजी रात्री १०.३० वाजता घडली आहे. याबाबत सोमवारी १३ ऑक्टोबर रोजी पहाटे ४ वाजता जळगाव तालुका पोलीस ठाण्यात अज्ञात वाहनावरील चालकावर गुन्हा दाखल करण्यात आला आहे. प्रकाश नाना बारेला वय ४५ रा. भोकर ता. जळगाव असे मयत झालेल्या प्रौढाचे नाव आहे.
जळगाव तालुक्यातील भादली ते भोकर रस्त्यावरून प्रकाश बारेला हा रविवारी १२ ऑक्टोबर रोजी रात्री १०.३० वाजेच्या सुमारास भोकर येथे जाण्यासाठी पायी निघाला होता. त्यावेळी त्यांच्या मागून येणाऱ्या अज्ञात वाहनाने त्याला जोरदार धडक दिली. या भीषण अपघातात प्रकाश बारेला याचा जागीच मृत्यू झाला. अपघात घडल्यानंतर दुचाकी चालक हा वाहन घेवून पसार झाला होता. याप्रकरणी त्यांचा चुलत भाऊ अनिल बारेला याने जळगाव तालुका पोलीस ठाण्यात फिार्यद दिली आहे. त्यानुसार जळगाव तालुका पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक शामकुमार मोरे हे करीत आहे.
ट्रकचे पंक्चर काढणे ठरले जीवघेणे; दोघांचा जागीच मृत्यू
जळगाव जिल्ह्यातून जाणाऱ्या राष्ट्रीय महामार्गावर पारोळा बायपासवर पंक्चर झालेल्या ट्रकची दुरुस्ती करत असताना मागून आलेल्या भरधाव ट्रकने धडक दिल्याने दोन व्यक्तींचा दुर्दैवी मृत्यू झाल्याची घटना ११ ऑक्टोबर रोजी दुपारी ३ वाजता घडली. मृत व्यक्तींपैकी एक जण गुजरात तर दुसरा चंद्रपूरचा रहिवासी आहे.
वीरेंद्र पतितपावन खोब्रागडे (वय-५२, रा. चंद्रपूर) आणि विभाभाई करसनभाई रबारी (वय-६२, रा. कच्छ-भुज, गुजरात) अशी अपघातात मयत झालेल्यांची नावे आहेत. मिळालेल्या माहितीनुसार, १२ चाकी (जीजे १२ बीएक्स ९३३२) क्रमांकाच्या ट्रकचे चाक पंचर झाल्यामुळे क्लीनर वीरेंद्र खोब्रागडे आणि विभाभाई रबारी हे पारोळा बायपासवरील वळणावर ट्रक रस्त्याच्या कडेला लावून पंचर काढण्याचे काम करत होते.
यावेळी चंद्रपूर येथील रहिवासी असलेल्या आमिर खान अहमद खान (वय-३५) हा ट्रक क्रमांक (एमएच ३४ सीक्यू ०७१७) भरधाव वेगाने घेऊन आला आणि त्याने उभ्या असलेल्या ट्रकला मागून जोरदार धडक दिली. ही धडक इतकी भीषण होती की, पंक्चर काढणाऱ्या दोघांनाही गंभीर दुखापत झाली आणि त्यांचा घटनास्थळीच मृत्यू झाला. ट्रकचालक निलेश जैन यांच्या फिर्यादीनुसार, अपघातास कारणीभूत ठरलेल्या ट्रकचालक आमिर खान अहमद खान याच्या विरोधात पारोळा पोलीस ठाण्यात गुन्हा दाखल करण्यात आला असून, पुढील तपास सुरू आहे.
