जळगाव : येथील मेहरुण परिसरातील मंगलपुरीत गल्लीत घरासमोर उभे राहून गप्पा मारणाऱ्या ५ महिलांसह २ चिमुरड्यांना भरधाव कारने जबर धडक दिली. या धडकेत एका महिलेचा जागीच मृत्यू झाला. चार महिला जखमी झाल्या आहेत .ही घटना १८ जुलै रोजी सायंकाळी ६:३० वाजता घडली आहे. एमआयडीसी पोलीस स्टेशनला घटनेची नोंद झाली आहे. जमावाने कार चालकाला चोप दिला असल्याने त्याला उपचारासाठी दाखल करण्यात आल्याचे समजते.
शोभा रमेश पाटील (वय ६० रा. साईप्रसाद कॉलनी, मंगलपूरी, मेहरुन) असे मृत महिलेचे नाव आहे. त्यांच्या पश्चात दिव्यांग पती, एक मुलगा, दोन मुली असा परिवार आहे.
जळगावातील मेहरुण परिसरात अत्यंत अरुंद रस्ता असलेल्या मंगलपुरी भागात दि. 18 रोजी सायंकाळी काही महिला गप्पा मारीत आपल्या घरासमोर उभ्या होत्या. तर एक महिला रस्त्यावरुन जात होती. त्याचवेळी सायंकाळी साडेसहा वाजता रामेश्वर कॉलनीकडून एक भरधाव कार (एम.एच.०५ ए.एस०५७४) रस्त्याने आली. या कार चालकाचे कुठलेही नियंत्रण नसल्याने या कारने घरासमोर उभ्या असलेल्या या महिलांना धडक देऊन उडविले. ही धडक इतकी भीषण होती की, त्यात दुध घेण्यासाठी जात असलेल्या शोभा रमेश पाटील यांना गंभीर दुखापत होवू त्यांचा जागीच मृत्यू झाला.
त्यांच्यासोबत असलेल्या संगीता प्रकाश महाजन (वय ४८), जयश्री जगदीश राऊत (वय ३०), सुमनबाई साहेबराव पाटील (वय ६५), अर्चना पाटील (वय ४०) या जखमी झाल्या. तर दोन लहान मुलं देखील जखमी झाले आहेत. एका महिलेच्या हातात असलेल्या चिमुकल्या बाळाला देखील मार लागला. या घटनेमुळे परिसरातील लोक जमा होवून त्यांनी तात्काळ जवळच्या खाजगी रुग्णालयात दाखल केले. जखमी महिलांपैकी एकीचे पती प्रकाश महाजन यांनी जखमींना अपघातग्रस्त कार मध्येच टाकून शासकीय वैद्यकीय महाविद्यालय व रुग्णालयात आणले.
दरम्यान, या अपघातातील कारचा चालक कार चालक पवन कैलास पाटील वय 25 रा. सप्तशृंगी कॉलनी रामेश्वर कॉलनी मेहरूण जळगाव हा नवशिक्या असल्याचे समोर आले आहे. अपघात झाल्यावर त्यास पकडून नागरिकांनी जागेवरच चांगला चोप दिला. त्यानंतर त्याला घटनास्थळी आलेल्या एमआयडीसी पोलिसांच्या स्वाधिन करण्यात आले. कारचा चालक रामेश्वर कॉलनी परिसरातील रहिवाशी आहे . दरम्यान या घटनेमुळे पाटील परिवारावर शोककळा पसरली आहे.
