जळगाव : धरणगाव तालुक्यातील हनुमंतखेडा येथे चारित्र्याच्या संशयावरून पतीने पत्नीवर कुऱ्हाडीने हल्ला करून तिचा निर्घृण खून केल्याची धक्कादायक घटना घडली आहे. या हल्ल्यात दहा वर्षीय मुलगाही गंभीर जखमी झाला आहे.
पोलीस सूत्रांनी दिलेल्या माहितीनुसार, हनुमंतखेडा येथील रहिवासी सोमनाथ उर्फ सोन्या अशोक सोनवणे हा पत्नी शीतल उर्फ आरती हिच्यावर चारित्र्यावरुन संशय घेत असे आणि तिला मारहाण करत असे. सोमवारी (दि.24) पहाटे सुमारे 2.45 वाजता त्याने पत्नीवर कुऱ्हाडीने सपासप वार करून तिचा खून केला. तसेच, त्याने आपल्या दहा वर्षीय मुलगा सिध्दू सोमनाथ सोनवणे याच्यावरही हल्ला करून त्याला गंभीर जखमी केले. या घटनेने परिसरात एकच खळबळ उडाली असून, मयत शीतल हिच्या भावाने भाऊसाहेब भावलाल पवार (रा. हनुमंतखेडा, ता. धरणगाव) यांनी पोलिस ठाण्यात फिर्याद दिली. त्यानुसार, आरोपी सोमनाथ उर्फ सोन्या अशोक सोनवणे याच्याविरोधात गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक पवन देसले यांच्या मार्गदर्शनाखाली सहायक पोलीस निरीक्षक निलेश वाघ, उपनिरीक्षक संतोष पवार आणि हवालदार राजू पाटील करत आहेत.
