जळगाव : पारोळा तालुक्यातील बहादरपूर शिवारात, बोरी नदीच्या काठावर सुरू असलेल्या एका मोठ्या बनावट देशी दारूच्या कारखान्यावर जळगाव पोलिसांनी धाड टाकून तो उद्ध्वस्त केला. या कारवाईत पोलिसांनी तब्बल ४० लाख ३३ हजार रुपयांचा मुद्देमाल जप्त केला असून, तीन आरोपींना अटक करण्यात आली आहे.
पोलीस निरीक्षक सचिन सानप यांना मिळालेल्या गुप्त माहितीच्या आधारे ही कारवाई करण्यात आली. पोलीस अधीक्षक डॉ. महेश्वर रेड्डी आणि अप्पर पोलीस अधीक्षक कविता नेरकर-पवार यांच्या मार्गदर्शनाखाली पारोळा पोलिसांनी अत्यंत नियोजनबद्ध पद्धतीने हा छापा टाकला. 'टँगो पंच' या नावाने बनावट देशी दारूची निर्मिती आणि पॅकिंग या ठिकाणी सुरू होती.
कारवाईत खालील प्रमुख मुद्देमाल जप्त:
तयार दारूचे बॉक्स आणि बाटल्या.
कच्चा माल (स्पिरिट) आणि रसायने.
बाटली पॅकिंग आणि सीलिंगसाठी लागणारी हाय-टेक मशिनरी.
दोन मालवाहू गाड्या (बोलेरो आणि स्विफ्ट डिझायर).
हजारो रिकाम्या बाटल्या, बूच आणि पॅकेजिंग साहित्य.
या प्रकरणी राकेश जैन, टिंन्या डोंगऱ्या पावरा आणि कतार सिंग पावरा या तिघांना अटक करण्यात आली असून, त्यांच्यावर गुन्हा दाखल करण्याची प्रक्रिया सुरू आहे. एवढ्या मोठ्या प्रमाणावर आणि अत्याधुनिक मशिनरीच्या साहाय्याने सुरू असलेला हा अवैध कारखाना राज्य उत्पादन शुल्क विभागाच्या नजरेतून कसा सुटला, याबाबत आश्चर्य व्यक्त केले जात आहे. या कारवाईमुळे पोलिसांच्या कामगिरीचे कौतुक होत असले तरी, संबंधित विभागांच्या कार्यक्षमतेवर प्रश्नचिन्ह निर्माण झाले आहे.
