जळगाव : जिल्हा महिला व बाल विकास अधिकारी यांच्या कार्यालयातून दोन महत्त्वाचे संगणक संच चोरीला गेल्याची धक्कादायक घटना उघडकीस आली आहे. मात्र, या चोरीबाबत तक्रार दाखल करण्यास जिल्हापेठ पोलीस ठाण्याचे पोलीस निरीक्षक नकार देत असल्याचा आरोप जिल्हा महिला व बाल विकास अधिकारी रफिक तडवी यांनी केला आहे.
चोरीला गेलेले संगणक जिल्हा कार्यालयाच्या कामकाजासाठी वापरण्यात येत होते. नव्याने आलेल्या संगणकांची नोंद करण्यासाठी मंगळवार (दि.11) रोजी पेंटरला बोलावले असता, दोन संगणक कार्यालयातून गायब असल्याचे लक्षात आले. कार्यालयाच्या आंतरिक चौकशीत ही संगणक चोरी सखी वन स्टॉप सेंटर, जळगाव येथे कंत्राटी सुरक्षारक्षक म्हणून कार्यरत असलेल्या शुभम हिरालाल परदेशी याने केल्याचे निष्पन्न झाले. त्याने हे संगणक आपल्या काकांच्या सांगण्यावरून चोरून नेल्याची माहिती समोर आली. विशेष म्हणजे शुभम परदेशी यांचे काका विजयसिंग इंदलसिंग परदेशी हे त्या वेळी जिल्हा महिला व बाल विकास अधिकारी पदावर कार्यरत होते.
चोरीसंदर्भात तक्रार दाखल करण्यासाठी संबंधित अधिकारी आणि इतर तीन कर्मचारी जिल्हापेठ पोलीस ठाण्यात गेले असता, पोलिसांनी गुन्हा दाखल करण्यास नकार दिला. पोलिसांकडून तक्रार नोंदवण्यास टाळाटाळ केली जात असल्याचा आरोप केला जात आहे. तसेच, चोरीच्या प्रकरणात आरोप झालेल्या शुभम परदेशी यांचे भाऊ आणि वहिणी पोलीस खात्यात कार्यरत असल्याने पोलिसांनी या प्रकरणाकडे जाणूनबुजून दुर्लक्ष केल्याची चर्चा आहे. या घटनेमुळे जिल्हा महिला व बाल विकास कार्यालयात खळबळ उडाली असून, पोलिसांच्या भूमिकेवर प्रश्नचिन्ह उपस्थित होत आहे.
