जळगाव : आखाजीचा सण म्हणजे खानदेशातील एक खास सण. झाडांवर झोके, बाजारात आलेले आंबे, कैऱ्यांचा सुमार, करंज्यांचा खमंग वास आणि प्रत्येक घरात होणारी पुरणपोळी... या सगळ्याचा मनमुराद आनंद घेत अख्खा खानदेश सण साजरा करतो.
मात्र शहरीकरणामुळे पूर्वीप्रमाणे खापरावरची (मातीच्या झाऱ्यावर भाजलेली) पुरणपोळी करण्याची परंपरा काहीशी मागे पडली आहे. यामुळे अशा पारंपरिक पुरणपोळीची चव पुन्हा अनुभवण्यासाठी नागरिकांची मागणी वाढली आहे. ही संधी ओळखून काही महिलांनी खापरावरील पुरणपोळी बनवण्याचा छोटासा व्यवसाय सुरू केला आहे.
या वर्षी आखाजीच्या दिवशी जळगाव शहरात महाराणा प्रताप पुतळ्याजवळ अशा खापरपोळी विक्रीसाठी महिलांनी स्टॉल लावले होते. सकाळपासूनच नागरिकांचा विशेषतः महिलांचा चांगलाच प्रतिसाद मिळाल्याचे चित्र पाहायला मिळाले. अनेक ठिकाणी खापरपोळीसाठी रांगा लागल्या होत्या.
धरणगाव, एरंडोल, पारोळा या तालुक्यांत खापरावरील पुरणपोळी ही पारंपरिक रुचिपूर्ण खासियत आहे. आता जळगाव शहरातही ती नव्याने लोकप्रिय होताना दिसत आहे. आखाजीच्या निमित्ताने माहेरवाशिणी मुलींसाठी घराघरात जेवणात पुरणपोळी, आंब्याचा रस, करंज्या, शंकरपाळे, कच्च्या कैऱ्या अशा पारंपरिक पदार्थांची रेलचेल असते. या पार्श्वभूमीवर खापरावरील पुरणपोळीचा व्यवसाय करणाऱ्या महिलांनी खानदेशाच्या चविला नवसंजीवनी दिल्याचे चित्र यंदा पाहायला मिळाले.
