धुळे : धुळे जिल्ह्यात स्वतंत्र कृषी विद्यापीठ स्थापन करण्याची मागणी धुळे लोकसभा मतदारसंघाच्या खासदार डॉ. शोभा बच्छाव यांनी राज्याचे कृषिमंत्री माणिकराव कोकाटे यांच्याकडे केली. या मागणीला कृषिमंत्र्यांनी सकारात्मक प्रतिसाद देत आवश्यक ती कार्यवाही करून धुळ्यात कृषी विद्यापीठ स्थापन करण्याचे आश्वासन दिले आहे.
धुळे शहरात सुमारे ५०० एकर जागेवर कार्यरत असलेले कृषी महाविद्यालय सध्या महात्मा फुले कृषी विद्यापीठ, राहुरी यास संलग्न आहे. हे महाविद्यालय धुळे, नाशिक, जळगाव आणि नंदुरबार जिल्ह्यांसाठी कृषी शिक्षण, संशोधन व तंत्रज्ञान सेवा पुरवते. येथे बी.एस्सी. (कृषी) आणि एम.एस्सी. (कृषी) अभ्यासक्रम सुरू आहेत.
राहुरी कृषी विद्यापीठाचा कार्यक्षेत्र फार मोठे असल्याने सर्व जिल्ह्यांवर प्रभावी देखरेख ठेवणे आणि कारभार सुरळीत चालवणे कुलगुरूंसाठी आव्हानात्मक ठरत आहे. त्यामुळे धुळे येथे स्वतंत्र कृषी विद्यापीठ झाल्यास प्रशासनिक सुलभता तर मिळेलच, शिवाय कृषी शिक्षण, संशोधन आणि विस्तार कार्यक्रमांनाही अधिक गती मिळेल.
उत्तर महाराष्ट्रात मोठ्या प्रमाणावर शेतकरी वर्ग शेती व्यवसायावर अवलंबून आहे. धुळे जिल्ह्यात आधुनिक कृषी तंत्रज्ञान, संशोधन व मार्गदर्शनाची सोय झाल्यास या शेतकऱ्यांना थेट फायदा होईल. विशेष म्हणजे, धुळे जिल्ह्यात कृषी विद्यापीठ व्हावे, ही मागणी अनेक वर्षांपासून प्रलंबित आहे. नागरिकही या मागणीसाठी सातत्याने आंदोलने करत आहेत.
खासदार डॉ. शोभाताई बच्छाव यांनी कृषिमंत्री कोकाटे यांची भेट घेऊन सविस्तर निवेदन सादर करत सर्व बाबी स्पष्ट केल्या. त्यांनी धुळे जिल्ह्याच्या भौगोलिक, कृषी व शैक्षणिक महत्त्वाबाबत माहिती दिली. त्यांच्या सविस्तर मांडणीमुळे कृषिमंत्र्यांनी सकारात्मक प्रतिसाद देत लवकरच धुळ्यात स्वतंत्र कृषी विद्यापीठ स्थापन करण्यासाठी कार्यवाही केली जाईल, असे आश्वासन दिले.
