धुळे | धुळे जिल्ह्यात कुष्ठरोग सर्वेक्षण शोध मोहीम सुरु झाली आहे. ही मोहिम 31 जानेवारी 2025 ते 14 फेब्रुवारी, 2025 या कालावधीत होणार आहे. अशी माहिती जिल्हा आरोग्य अधिकारी डॉ.सचिन बोडके यांनी दिली आहे.
जिल्हा परिषदेच्या आरोग्य विभागामार्फत धुळे जिल्ह्यात 31 जानेवारी,2025 ते 14 फेब्रुवारी, 2025 या दरम्यान कुष्ठरोग सर्वेक्षण शोध मोहीम सुरू केली आहे. या मोहिमेचा मुख्य उद्देश कुष्ठरोग रुग्णांचा शोध घेणे. आणि त्यांना योग्य वेळेत उपचार मिळवणे आहे. यामुळे कुष्ठरोगाच्या प्रसारावर नियंत्रण ठेवता येईल आणि रुग्णांना सुसज्ज आरोग्य सेवा मिळवता येईल.
कुष्ठरोग हा एक संसर्गजन्य आजार आहे, जो चांगल्या उपचारांच्या अभावी गंभीर होऊ शकतो. यामुळे शारीरिक विकलांगता आणि मानसिक आघात होऊ शकतात. कुष्ठरोगाचे प्रारंभिक लक्षणे ओळखून त्वरित उपचार घेणे अत्यंत महत्त्वाचे आहे. या मोहिमेद्वारे कुष्ठरोगाच्या रुग्णांचा शोध घेऊन त्यांना योग्य उपचार, सल्ला आणि सहाय्य पुरवले जाईल.
सन 2027 पर्यंत कुष्ठरोगाचा प्रसार शून्यावर आणण्याच्या उद्दिष्टाने, ग्रामीण व शहरी भागातील प्रत्येक घरात जाऊन कुष्ठरोगाची लक्षणे ओळखुन लोकांना कुष्ठरोगाच्या लक्षणांची माहिती देण्यात येईल. त्यानंतर कुष्ठरोगाच्या रुग्णांना योग्य उपचार मिळवण्याची प्रक्रिया सुनिश्चित केली जाईल. ह्या मोहिमेसाठी 1 हजार 353 पथकांची स्थापना करण्यात आली आहे, प्रत्येक पथकात आशा स्वयंसेविका व एक पुरुष घराघरात जाऊन 2 वर्षावरील सर्व नागरिकांची तपासणी करण्यात येईल. मोहिमेच्या कालावधीत 20 लाख 3 हजार 515 इतकी लोकसंख्या व 3 लाख 89 हजार 214 घरांची तपासणी केली जाईल. ह्या तपासणीत संशयित रुग्ण आढळल्यास त्यांची त्वरित वैद्यकीय अधिकारी ह्यांच्या मार्फत तपासणी केली जाईल, निदान झाल्यास तत्काळ औषौधोपचार चालू करण्यात येणार आहे.
शरीरावरील त्वचेपेक्षा फिक्कट किवा लालसर रंगाचा त्रास ना देणारा, कुठलाही चट्टा/डाग.,
तेलकट, गुळगुळीत, सुजलेली व लालसर त्वचा.,
हात पायांना सुन्नपणा/बधिरता, स्पर्श ज्ञान नसणे, स्नायूंचा अशक्तपणा व डोळा, चेहरा, हात किवा पायांची विकृती.,
या मोहिमेचा आणखी एक महत्त्वाचा भाग म्हणजे कुष्ठरोगाची लक्षणे आणि उपचार पद्धतीबद्दल लोकांना जागरूक करणे. रुग्णांना त्यांची स्थिती कशी ओळखता येईल आणि वेळेवर उपचार मिळवण्यासाठी कशाप्रकारे मदत घेतली जाऊ शकते याविषयी मार्गदर्शन केले जाईल.
कुष्ठरोग हा संक्रमक असला तरी योग्य उपचाराने पूर्णपणे बरा होऊ शकतो. लोकांना योग्य माहिती आणि समज देऊन कुष्ठरोगाच्या लक्षणांच प्रारंभिक अवस्था ओळखून उपचार करणे शक्य होईल. सरकारच्या या मोहिमेचा उद्देश केवळ रुग्णांना उपचार देणे नाही, तर या आजाराविषयी समाजात पसरलेली भय आणि सामाजिक कलंक दूर करणे देखील आहे.
कुष्ठरोगाच्या लक्षणांचा शोध घेण्यासाठी अधिकाधिक लोकांपर्यंत पोहोचणे आवश्यक आहे. यासाठी सर्व नागरिकांनी या मोहिमेत सक्रियपणे सहभागी होऊन घरी येणाऱ्या आरोग्य पथकांना सहकार्य करावे, असे आवाहन जिल्हाधिकारी जितेंद्र पापळकर, जिल्हा परिषदेचे मुख्य कार्यकारी अधिकारी विशाल नरवाडे,जिल्हा आरोग्य अधिकारी डॉ.सचिन बोडके यांनी केले आहे.
