धुळे : धुळे शहरात दिवसा घरफोडी करून सोने-चांदीचे दागिने आणि रोख रक्कम चोरणाऱ्या मध्य प्रदेशातील इंदूर येथील दोन सराईत गुन्हेगारांना स्थानिक गुन्हे अन्वेषण शाखेच्या पथकाने अटक केली आहे. अकरम अब्दुल गफार अब्बासी आणि त्याचा भाऊ जावेद अब्दुल गफार अब्बासी अशी संशयितांची नावे आहेत. याप्रकरणी चोरीचे दागिने विकत घेणाऱ्या देवास येथील कारागिराकडून दागिन्यांची लगड आणि टॉगलही हस्तगत करण्यात आले आहेत.
धुळे शहरातील शिव वसंत अपार्टमेंटमध्ये राहणारे प्रणय राजेंद्र खंडेलवाल यांच्या घरातील लॉकरमध्ये ठेवलेले चार लाख १२ हजार ६०० रुपये किमतीचे सोने-चांदीचे दागिने आणि रोख रक्कम अज्ञात चोरट्याने चोरून नेली होती. या प्रकरणी चाळीसगाव रोड पोलिस ठाण्यात गुन्हा दाखल करण्यात आला होता.
या गुन्ह्याचा समांतर तपास स्थानिक गुन्हे शाखेचे पोलिस निरीक्षक ज्ञानेश्वर वारे यांच्या मार्गदर्शनाखाली सुरू होता. तांत्रिक विश्लेषणाच्या आधारे हा गुन्हा मध्य प्रदेशातील इंदूर येथील अकरम अब्दुल गफार अब्बासी आणि त्याचा भाऊ जावेद अब्दुल गफार अब्बासी यांनी केल्याची माहिती तपासात समोर आली.
त्यानंतर सहाय्यक पोलिस निरीक्षक दीपक ढोके, पोलिस उपनिरीक्षक अमरजित मोरे, धनंजय मोरे तसेच पोलिस अंमलदार प्रल्हाद वाघ, दिनेश परदेशी, देवेंद्र ठाकूर, महेंद्र सपकाळ, हर्षल चौधरी, अमोल पाटील, अमोल जाधव आणि सिद्धार्थ निकम यांच्या पथकाला इंदूर येथे रवाना करण्यात आले.
पथकाने इंदूर येथे अकरम अब्बासी याला ताब्यात घेऊन चौकशी केली. त्यावेळी त्याने आपल्या भावासह घरफोडी केल्याची कबुली दिल्याचे पोलिसांनी सांगितले. जावेद हा बाहेरगावी गेल्याची माहितीही त्याने दिली. चोरी केलेले सोने-चांदीचे दागिने देवास येथील शेख बासेद शेख सबुर या कारागिराला विकल्याचेही त्याने चौकशीत सांगितले.
त्यानुसार पोलिस पथक अकरम अब्बासी याला सोबत घेऊन देवास येथे गेले. तेथे कारागिराकडे चौकशी केली असता, त्याने संबंधित दागिने विकत घेतल्याचे सांगितले. त्याच्याकडून दागिन्यांची लगड आणि टॉगल हस्तगत करण्यात आले. या प्रकरणाचा पुढील तपास पोलिस करत आहेत. अटकेची स्थिती स्पष्ट करून द्यासंशयितांचा संदर्भ अधिक अचूक कराबातमी अधिक संक्षिप्त करा
