धुळे : गर्भधारणापूर्व व प्रसुतीपूर्व निदान तंत्र (लिंग निवडीस प्रतिबंध) कायदा १९९४ सुधारित २००३ ची जिल्ह्यात प्रभावीपणे अंमलबजावणी व्हावी, जिल्ह्यात मुलींचा जन्मदर वाढावा, यासाठी महसूल, आरोग्य व पोलीस विभागाच्या संयुक्त पथकाने धुळे जिल्ह्यातील सोनोग्राफी, एमटीपी व प्रसूतीगृहांची धडक मोहीमेतंर्गत तपासणी करण्यात आली. या तपासणीत २ हॉस्पिटल व १ सोनोग्राफी सेंटरला नोटीस बजावण्यात आल्याची माहिती जिल्हा शल्यचिकित्सक डॉ. दत्ता देगांवकर यांनी बुधवारी (दि.१९) दिली.
गर्भलिंग निदान चाचणी प्रकरणे जिल्ह्यात घडू नयेत, यासाठी धुळे जिल्ह्यातील सर्व सोनोग्राफी, एमटीपी व प्रसूतीगृह यांची तपासणी करण्याचे निर्देश जिल्हाधिकारी तथा पीसीपीएनडीटी जिल्हास्तरीय दक्षता समितीचे अध्यक्ष जितेंद्र पापळकर यांनी बैठकीत दिले होते. त्यानुसार महसूल विभाग, आरोग्य विभाग व पोलीस प्रशासन यांची संयुक्तरित्या चार पथके तयार करून धुळे जिल्ह्यात एकाच दिवशी १६ सोनोग्राफी सेंटर, ८ एमटीपी सेंटर तसेच ४ हॉस्पीटलची तपासणी करण्यात आली. यात जिल्ह्यातील शहरी भागातील ४ हॉस्पिटलची तपासणी करण्यात आली. यावेळी २ हॉस्पिटलला नोटीस बजावण्यात आली आहे. त्याचप्रमाणे तालुकास्तरीय पथकामार्फत साक्री येथील ९ सोनोग्राफी सेंटर तर ४ एमटीपीची तपासणी केली. तसेच शिंदखेडा येथील ३ सोनोग्राफी सेंटरची तपासणी करण्यात आली. त्यातील १ सेंटरला नोटीस बजावण्यात आली आहे. तर शिरपुर येथे ४ सोनोग्राफी व ४ एमटीपी सेंटरची धडक मोहिमे अंतर्गत तपासणी करण्यात आली. या कारवाईनंतर पुढील कालावधीत या प्रकारची कारवाई संपूर्ण जिल्ह्यात तसेच गुजरात व मध्यप्रदेश सीमेलगतच्या सोनोग्राफी सेंटरवर करण्यात येणार आहे.
गर्भलिंग निदान चाचणीबाबत नागरिकांना माहिती मिळाल्यास नागरिकांनी टोल फ्री क्रमांक 18002334475/104 किंवा http://amchimulgimaha.in या संकेतस्थळावर माहिती द्यावी. माहिती देणाऱ्याचे नाव गोपनीय ठेवण्यात येईल व दिलेली माहिती खरी असल्यास खबरी योजनेतंर्गत माहिती देणाऱ्यास १ लाख रुपयांचे बक्षीस देण्यात येईल, असे आवाहन जिल्हा शल्यचिकित्सक डॉ. देगांवकर यांनी केले आहे.
