धुळे : हॉकीचे महान खेळाडू मेजर ध्यानचंद यांच्या जन्मदिनानिमित्त शुक्रवार (दि.29) रोजी राष्ट्रीय क्रीडा दिन उत्साहात साजरा करण्यात आला. याप्रसंगी जिल्ह्यातील आंतरराष्ट्रीय, राष्ट्रीय पातळीवरील प्रावीण्य प्राप्त व सहभागी झालेल्या 47 खेळांडूचा मान्यवरांच्या हस्ते सत्कार करण्यात आला.
जिल्हाधिकारी कार्यालयातील जिल्हा नियोजन भवनात हा कार्यक्रम पार पडला. आमदार राघवेंद्र पाटील, जिल्हाधिकारी भाग्यश्री विसपुते, जिल्हा क्रीडा अधिकारी मनोहर पाटील, क्रीडा अधिकारी रेखा पाटील, धुळे क्रीडा महासंघाचे सचिव पंढरीनाथ बडगुजर, धुळे जिल्हा शारीरिक शिक्षण संघटनेचे सचिव आनंद पवार, धुळे जिल्हा राष्ट्रीय तालीम संघाचे सचिव सुनील चौधरी, महाराष्ट्र नेटबॉल संघटनेचे योगेश वाघ यांच्यासह आंतरराष्ट्रीय व राष्ट्रीय क्रीडा स्पर्धेत सहभागी झालेले व प्राविण्य प्राप्त खेळाडू उपस्थित होते.
जिल्हाधिकारी विसपुते म्हणाल्या की, जिल्ह्यातील जास्तीत जास्त खेळांडूनी विविध खेळ प्रकारात प्रावीण्य मिळवून जिल्ह्याचे नाव राष्ट्रीय व आंतरराष्ट्रीय पातळीवर उंचावण्यासाठी प्रयत्न करावेत.
यावेळी स्व.खाशाबा जाधव यांच्या जीवन चरित्र्यावर आधारित निबंध स्पर्धेत प्रथम, द्वितीय व तृतीय विजेत्यांना त्याचप्रमाणे 17 खेळाडूंना शिष्यवृत्ती वाटप करण्यात येवून सत्कार करण्यात आला. कार्यक्रमाचे प्रास्ताविक जिल्हा क्रीडा अधिकारी मनोहर पाटील यांनी केले. सूत्रसंचलन योगेश्वरी मिस्तरी यांनी, तर श्रीधर कोठावदे यांनी आभार मानले.
कार्यक्रमाच्या यशस्वितेसाठी जिल्हा क्रीडा अधिकारी कार्यालयातील गौरव परदेशी, योगेश देवरे, स्वप्नील बोंडे, क्रीडा मार्गर्शक योगेश पाटील, मदन गावित, मृदा अग्रवाल, दिनेश शिरसाट, राहुल देवरे आदींनी परिश्रम घेतले.
