नगर: राहुरीच्या पोटनिवडणुकीसाठी राष्ट्रवादी काँग्रेसकडून सोमवारी (दि.6) उमेदवारी अर्ज दाखल करण्यात येणार असल्याची माहिती प्रदेश उपाध्यक्ष तथा नगर जिल्हा निरीक्षक अंकुश काकडे यांनी दिली.
जिल्हा राष्ट्रवादीच्या बैठकीत ते बोलत होते. खा. नीलेश लंके, जिल्हाध्यक्ष दादा कळमकर, संदीप वर्पे, अरुण कडू, बाबासाहेब भोस, रावसाहेब म्हस्के, ॲड. प्रताप ढाकणे, शौकत तांबोळी यांच्यासह 11 तालुका प्रमुख बैठकीस उपस्थित होते.
अकुंश काकडे यांनी दोन्ही राष्ट्रवादी विलिनीकरणाचा विषय संपुष्टात आल्याचे स्पष्ट करताना जोमाने पक्ष बांधणी करण्याचे आवाहन केले. आगामी जिल्हा परिषद निवडणुकीसाठी उमेदवारांची शोधाशोध आतापासूनच करावी. ऐनवेळी धावपळ नको म्हणून संभाव्य नावे शोधून ठेवावीत.
महिन्यातील सात दिवस नगर जिल्ह्यासाठी देणार असून प्रत्येक तालुकास्तरावर पक्षाची बैठक घेतली जाईल, असे काकडे यांनी सांगितले. राहुरी विधानसभा पोटनिवडणुकीची प्रक्रिया सुरू आहे. राहुरीची जागा राष्ट्रवादीच्या कोट्यात असून पोटनिवडणूकीत पक्षाकडून उमेदवार दिला जाणार असून सोमवारी अर्ज दाखल केला जाणार असल्याचे काकडे यांनी यावेळी जाहीर केले.
सोमवार शेवटचा दिवस!
सोमवारी अर्ज दाखल करण्याचा शेवटचा दिवस आहे. आजअखेर एकच अपक्ष उमेदवारी अर्ज दाखल झाला आहे. काँग्रेसनेही या जागेवर उमेदवार देण्याचे घोषित केले आहे. याशिवाय भाकप आणि वंचितने उमेदवार जाहीर केले आहेत. शिवसेनेचे जिल्हा प्रमुख रावसाहेब खेवरे यांनीही उमेदवारी करणार असल्याचे जाहीर केले आहे. दिवंगत शिवाजी कर्डिले यांच्या रिक्त जागेवर होणाऱ्या पोटनिवडणुकीसाठी भाजपने अक्षय कर्डिले यांना उमेदवारी जाहीर केली असून ते सोमवारी अर्ज दाखल करणार आहेत.
