नगर: नगर-मनमाड महामार्गाचे अहिल्यानगर ते सावळीविहीरपर्यंतचे काम नाशिकच्या सिंहस्थ कुंभमेळ्यापूर्वी पूर्ण करण्याचा निर्णय जलसंपदामंत्री राधाकृष्ण विखे पाटील आणि सार्वजनिक बांधकाममंत्री शिवेंद्रराजे भोसले यांच्या प्रमुख उपस्थितीत झालेल्या बैठकीत गुरुवारी घेण्यात आला. त्याचबरोबर शेवगाव बाह्यवळण रस्त्याचे काम महाराष्ट्र राज्य रस्ते विकास महामंडळाच्या नियंत्रणाखाली करण्याचेही निश्चित करण्यात आले.
कुंभमेळ्याच्या पार्श्वभूमीवर नगर-मनमाड महामार्गावरील सावळीविहीर ते अहिल्यानगर रस्त्याचे काम निधारित वेळेत पूर्ण करा, मार्गाचे महत्त्व लक्षात घेऊन कामामध्ये कोणतीही तडजोड न करता दर्जेदार कामास प्राधान्य द्या, अशा सूचना जलसंपदामंत्री तथा पालकमंत्री राधाकृष्ण विखे पाटील यांनी सार्वजनिक बांधकाम विभागाच्या अधिकार्यांना दिल्या. (Latest Ahilyanagar News)
अहिल्यानगर जिल्ह्यातील शेवगाव बाह्यवळण रस्ता तसेच सावळीविहीर ते अहिल्यानगर रस्त्याच्या कामाचा आढावा घेण्यासाठी विधान भवनात विखे पाटील यांच्या प्रमुख उपस्थितीत बैठकीचे आयोजन करण्यात आले होते. या बैठकीला सार्वजनिक बांधकाम विभागाचे मंत्री शिवेंद्रराजे भोसले यांच्यासह विभागाचे अधिकारी उपस्थित होते. बैठकीमध्ये प्रामुख्याने शेवगाव बाह्यवळण रस्ताच्या कामाच्या आराखड्याची माहिती अधिकार्यांनी सादर केली. रस्ताच्या कामासाठी करावे लागणारे भूसंपादन आणि यासाठी निधी उपलब्धतेचा आढावाही घेण्यात आला.
यापूर्वी या प्रकल्पाचा आढावा घेण्यासाठी माजी खासदार डॉ. सुजय विखे पाटील आणि आ.मोनिका राजळे यांच्या पाठपुराव्यामुळे झालेल्या बैठकांमध्ये या मार्गाच्या कामाचा आराखडा निश्चित करण्यात आला होता.
शहरातून मराठवाड्याकडे जाणारी वाहतूक सुरळीत व्हावी यासाठी 22.602 कि.मी.लांबीच्या या रस्ते प्रकल्पासाठी 56.191 हेक्टर इतकी जमीन संपादित करावी लागणार असून यासाठी 80 कोटी रुपयांच्या निधीचा प्रस्ताव अर्थसंकल्पातील तरतुदीसाठी सादर करण्यात आल्याचे बैठकीत सांगण्यात आले.
मात्र सदरचा मार्ग दोन विभागांना जोडणारा असल्याने तो चौपदरी कसा होईल हा दृष्टिकोन ठेवून कामाचे नियोजन करावे, अशा सूचना मंत्री राधाकृष्ण विखे पाटील आणि मंत्री शिवेंद्रराजे भोसले यांनी बैठकीत दिल्या.
515 कोटी मंजूर; निविदा प्रक्रियाही पूर्ण
अहिल्यानगर ते सावळीविहीर या रस्ताच्या कामाची निविदा प्रक्रिया पूर्ण होऊन कामाच्या सूचनाही निर्गमित झाल्या आहेत सुमारे 515 कोटी रुपयांचा निधी यासाठी मंजूर असून कुंभमेळाच्या दृष्टीने या रस्त्याचे काम पूर्ण करण्याच्या सूचना मंत्री विखे पाटील यांनी बैठकीत दिल्या. कामाच्या गुणवतेत कोणतीही तडजोड न करण्याचे निर्देश त्यांनी दिले.
