करंजी: कान्होबावाडी येथील जिल्हा परिषद प्राथमिक शाळेची पटसंख्या वाढविण्यासाठी सकारात्मक पावले उचलण्याचा निर्धार तेथील ग्रामस्थांनी आज केला. तीन विद्यार्थी आणि दोन शिक्षिका या ‘पुढारी’ने बुधवारी प्रसिद्ध केलेल्या बातमीच्या पार्श्वभूमीवर शाळा व्यवस्थापन समितीने बैठक घेतली.
दरम्यान, गटशिक्षणाधिकारी सचिन राख यांच्यासह शिक्षण विस्तार अधिकारी आणि केंद्रप्रमुखांनी शाळेला भेट देऊन परिस्थितीचा आढावा घेत शिक्षिकांना मार्गदर्शन केले. शाळेच्या शैक्षणिक कामाची सविस्तर माहिती घेतली.
दिवसभरात केंद्रप्रमुख रामदास बोंबले यांनी दोनदा शाळेला भेट देऊन विद्यार्थ्यांची पटसंख्या वाढवण्यासाठी काय करता येईल याबाबत ऊहापोह केला. त्याचबरोबर मुख्याध्यापक व सहशिक्षिका यांनी देखील शाळेमध्ये वेळेवर आले पाहिजे, शाळा वेळेवर भरली व सुटली पाहिजे याबाबत सक्त सूचना केल्या. शाळा व्यवस्थापन समिती व पालकांची संयुक्त बैठक घेऊन विद्यार्थी संख्या वाढवण्यासाठी प्रयत्न करण्याचे त्यांनी सूचित केले.
करंजीचे उपसरपंच अर्जुन अकोलकर व पालकांनी शाळेला भेट देऊन पटसंख्या वाढवण्यासाठी सर्वतोपरी सहकार्य करण्याची ग्वाही दिली. यावेळी मुख्याध्यापिका प्रतिभा देठे व सहशिक्षिका मीना खेत्रे यांच्यासह दोन विद्यार्थी उपस्थित होते.
