नगर: वाहन संशोधन आणि विकास संस्थेची (व्हीआरडीई) मुख्य पिण्याच्या पाण्याची वाहिनी फोडून त्यावर सहा ठिकाणी अनधिकृत नळ कनेक्शन घेऊन सरकारी मालमत्तेचे नुकसान केले आहे. हा प्रकार 20 एप्रिल रोजी घडकीस आला. याप्रकरणी संस्थेचे प्रशासकीय अधिकारी विठ्ठल मुरलीधर वायकर यांच्या फिर्यादीवरून कोतवाली पोलिस ठाण्यात गुन्हा दाखल करण्यात आला आहे.
संस्थेचा पाणीपुरवठा विस्कळीत झाल्याने संचालकांच्या आदेशानुसार लष्करी अभियंता सेवेच्या कर्मचाऱ्यांसह 14 किलोमीटर लांबीच्या जलवाहिनीची तपासणी करण्यात आली. यावेळी नगर-दौड रस्त्यावरील सॉलिटेअर इमारत परिसरातील नाल्यात तीन ठिकाणी, पांजारपोळ जवळ दोन ठिकाणी आणि कायनेटिक कंपनीच्या पुढे एका ठिकाणी अशा एकूण सहा ठिकाणी चोरून नळ कनेक्शन घेतल्याचे उघड झाले.
अज्ञात व्यक्तीने स्वतःच्या फायद्यासाठी सरकारी जलवाहिनी फोडून पाण्याचा गैरवापर केला आहे. त्यानुसार पोलिस ठाण्यात गुन्हा दाखल करण्यात आला. कोतवाली पोलिस गुन्ह्याचा तपास करीत आहेत.
