नगर: शहरातील पुणे बसस्थानक परिसरातून एसटी महामंडळात लिपिक पदावर कार्यरत असणाऱ्या प्रवाशाचे अपहरण करून त्याला निर्जनस्थळी नेत मारहाण करूत लुटणाऱ्या दोन अट्टल गुन्हेगारांना कोतवाली पोलिस ठाण्याच्या गुन्हे शोध पथकाने अवघ्या २४ तासांत सावेडी परिसरातून बेड्या ठोकल्या.
त्यांच्याकडून लुटलेली रोकड, मोबाईल व दुचाकी असा ७२ हजारांचा मुद्देमाल हस्तगत केला. अभिषेक सुनील शिरसाठ (वय २३, रा. अंबर अपार्टमेंट, सावेडी रोड, अहिल्यानगर), अनुष शांतवन धीवर (रा. संत ज्ञानेश्वर अपार्टमेंट, सावेडी, अहिल्यानगर) असे आरोपींची नावे आहेत.
१८ ऑगस्ट रोजी फिर्यादी (प्रवासी) हे पुणे बसस्थानक परिसरात असताना आरोपींनी त्यांना गाठले. आरोपींनी फिर्यादीस बुरुडगाव रोड येथील निर्जनस्थळी उचलून नेले. तेथे त्यांना लाकडी दांडक्याने व लाथाबुक्यांनी जबर मारहाण केली. त्यानंतर फिर्यादीच्या खिशातील मोबाईल जबरदस्तीने काढून घेतला. एवढ्यावरच न थांबता, आरोपींनी मोबाईल व 'फोन पे'चा पासवर्ड बळजबरीने मिळवून फिर्यादीच्या खात्यावरून ७,१०० रुपये अनोळखी खात्यावर ट्रान्सफर केले आणि फिर्यादीला सोडून पळ काढला. याप्रकरणी कोतवली पोलिस ठाण्यात गुन्हा दाखल करण्यात आला.
घटनेचे गांभीर्य ओळखून पोलिस निरीक्षक नितीन देशमुख व गुन्हे शोध पथकाचे पोलिस उपनिरीक्षक गणेश देशमुख यांनी तपासाची चक्रे फिरविली. परिसरातील सीसीटीव्ही फुटेज, तांत्रिक विश्लेषणाआधारे दोन संशयितांना ताब्यात घेतले. त्यांनी गुन्ह्याची कबुली देत अभिषेक शिरसाठ, अनुष धीवर अशी नावे सांगितली आणि आरोपी प्रवीण शेजवळ (रा. कोंढवड, ता. राहुरी, जि. अहिल्यानगर) याच्या साथीने गुन्हा केल्याची कबुली दिली. पोलिसांनी त्याच्या ताब्यातून मोपेड दुचाकी, मोबाईल फोन, रोकड ७२ हजार १०० रुपयांचा मुद्देमाल जप्त केला. गुन्ह्याचा तपास उपनिरीक्षक दीपक मेढे करीत आहेत.
ही कारवाई उपनिरीक्षक गणेश देशमुख, दीपक मेढे, पोलिस अंमलदार बाळकृष्ण दौड, रोहिणी दरंदले, राहुल शिंदे, विनोद बोरगे, साबिर शेख, विशाल दळवी, दीपक रोहकले, शिरीष तरटे, सुरज कदम, सत्यम शिंदे, दत्तात्रय कोतकर, अतुल काजळे, अमोल गाडे, सचिन लोळगे, महेश पवार, रमेश शिंदे, संकेत धीवर यांच्या पथकाने केली.
