मुंबई : मुंबईतील बीकेसी येथील जिओ वर्ल्ड सेंटर येथे 1 ते 4 मे 2025 पर्यंत ‘वर्ल्ड ऑडिओ व्हिज्युअल एंटरटेन्मेंट समिट’ (वेव्ह) ही भव्य परिषद आयोजित केली असून महाराष्ट्र दिनी 1 मे रोजी पंतप्रधान नरेंद्र मोदी यांच्या हस्ते उद्घाटन होणार आहे. पंतप्रधान दिवसभर मुंबईत असणार आहेत.
मुख्यमंत्री देवेंद्र फडणवीस यांच्या नेतृत्वाखाली हे आयोजन होत आहे. त्यांच्या सोबत परराष्ट्र मंत्री एस.जयशंकर, केंद्रीय रेल्वे मंत्री अश्विनी वैष्णव, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांचाही सहभाग राहणार आहे,अशी माहिती उद्योग मंत्री उदय सामंत यांनी पत्रकार परिषदेत दिली. 33 देशांतील मंत्री व अधिकारी, तसेच 120 आंतरराष्ट्रीय कंपन्यांचे सीईओ यांंच्यासह बॉलीवूड, टॉलीवूड, मराठी चित्रपटसृष्टीतील अनेक दिग्गज सहभागी होणार आहेत.
हा कार्यक्रम महाराष्ट्राच्या सांस्कृतिक, औद्योगिक व पर्यटन क्षेत्राला जागतिक स्तरावर नेण्याची संधी आहे. यासाठी शासनाला सर्वांचे सहकार्य अपेक्षित आहे, असे आवाहनही सामंत यांनी केले. या परिषदेत परिसंवाद, राउंड टेबल कॉन्फरन्स आणि सांस्कृतिक कार्यक्रम होतील. 3 मे रोजी नवी मुंबईत डी. वाय. पाटील स्टेडियमवर ए. आर. रहमान यांचा सांगीतिक कार्यक्रम होईल.
