मुंबई : तेलगू पद्मशाली समाजाचे आराध्य दैवत महर्षी मार्कंडेश्वर महामुनी यांचे बीडीडी चाळ परिसरातील श्री मार्कंडेश्वर देवस्थानम मंदिर लवकरच नव्या आणि भव्य स्वरूपात उभे राहणार आहे. याबाबतचा निर्णय शुक्रवारी म्हाडा, टाटा कन्स्ट्रक्शन व मंदिर विश्वस्त समितीसोबत झालेल्या बैठकीत घेण्यात आला.
वरळी बिडीडी चाळींचा पुनर्विकास सुरू असल्यामुळे या विकासादरम्यान महर्षी मार्कंडेश्वर महामुनी यांचे पुरातन मंदिर पाडण्यात आले होते. शुक्रवारी झालेल्या बैठकीत हे मंदिर नव्याने उभारण्याचे ठरवण्यात आले. यावेळी स्थानिक आमदार सुनील शिंदे, श्री. मार्कंडेश्वर देवस्थानम ट्रस्टचे चेअरमन रमेश मंथेना, सचिव कैलास एकलदेवी, विश्वस्त मधू भोजा, कृष्णा हरीस्वामी, मॅनेजिंग कमिटीचे अध्यक्ष सिरिमल्ला श्रीनिवास आदी उपस्थित होते.
