मुंबई: राज्यातील विशेष सखोल मतदार यादी पुनरावलोकन (एसआयआर) प्रक्रियेला केंद्रीय निवडणूक आयोगाने ८ ऑगस्टपर्यंत (१० दिवसांची) मुदतवाढ दिली आहे. मुख्य निवडणूक आयुक्तांनी पत्रकार परिषदेत ही घोषणा केली.
या निर्णयामुळे मतदार यादी पडताळणीसाठी प्रशासनाला अतिरिक्त वेळ मिळणार असून, नागरिकांनाही आवश्यक कागदपत्रे सादर करण्यासाठी अधिक संधी उपलब्ध होणार आहे. बूथ लेव्हल अधिकारी (बीएलओ) यांच्यामार्फत घरोघरी जाऊन सुरू असलेली मतदार पडताळणी मोहीम आता ८ ऑगस्टपर्यंत चालणार आहे.
यापूर्वी ही प्रक्रिया २९ जुलैपर्यंत पूर्ण करण्याचे नियोजन होते. अतिरिक्त १० दिवसांचा कालावधी मिळाल्याने मतदार यादी अधिक अचूक आणि त्रुटीविरहित करण्यास मदत होईल, असा आयोगाचा विश्वास आहे.
मुदतवाढीमुळे संपूर्ण एसआयआर प्रक्रियेच्या वेळापत्रकातही बदल करण्यात आला आहे. यापूर्वी ५ ऑगस्ट रोजी प्रसिद्ध होणारी मसुदा मतदार यादी आता १७ ऑगस्ट रोजी प्रसिद्ध केली जाणार आहे. त्यानंतर दावे आणि हरकती स्वीकारण्याची प्रक्रिया पार पडून अंतिम मतदार यादी निश्चित करण्यात येणार आहे.
