मुंबई : कोल्हापुरातील शाही दसर्यानंतर आता तुळजापुरातील तुळजाभवानी मातेच्या शारदीय नवरात्रौत्सवाचा समावेश हा महाराष्ट्राच्या प्रमुख महोत्सवात करण्यात आला आहे. त्यानुसार आता येत्या नवरात्रौत्सवात घटस्थापनेपासून दसर्यापर्यंत विविध सांस्कृतिक कार्यक्रमांचे आयोजन करण्यात येणार आहे. राज्याच्या पर्यटन विभागाने सोमवारी याबाबतचे परिपत्रक जारी केले आहे.
महाराष्ट्रातील साडेतीन शक्तिपीठांपैकी एक पीठ असलेल्या श्री तुळजाभवानी आईचे प्राचीन मंदिर देशभर प्रसिद्ध आहे. येथील शारदीय नवरात्र महोत्सवाच्या काळात महाराष्ट्रासह कर्नाटक व तेलंगणासह देशातील विविध भागांमधून सुमारे 50 लाख भाविक दर्शनासाठी येतात. महोत्सवाच्या माध्यमातून पर्यटनाला चालना देणार्या नवरात्र काळात तुळजाभवानी मातेवरील गोंधळी गीत, भजन, नृत्य, शास्त्रीय व लोकसंगीत अशा विविध प्रकारच्या सांस्कृतिक कार्यक्रमांचे आयोजन महोत्सवाचा केंद्रबिंदू असतो. यामध्ये महाराष्ट्रातील तसेच राष्ट्रीय स्तरावरील ख्यातनाम कलाकार सहभागी होत असतात. ही बाब लक्षात घेत या महोत्सवाच्या माध्यमातून पर्यटनाला अधिक चालना देण्यासाठी या महोत्सवाचा समावेश महाराष्ट्राच्या प्रमुख महोत्सवात करण्यात आला आहे.
धार्मिक विधीबरोबरच राष्ट्रीय व प्रादेशिक पातळीवरील सुप्रसिध्द कलाकारांचे सांस्कृतिक कार्यक्रम, प्रबोधनपत्र कार्यक्रम, भव्य लोकसंगीत मैफल, 300 ड्रोनव्दारे नवरात्र थीम लाईट शो, चित्रकलेसह व्याख्याने तसेच मॅरेथॉन आणि फॅम टूर्सचे तसेच पर्यटन विषयक मेळाव्यांचे आयोजन करण्यात येणार असल्याचे परिपत्रकात नमूद केले आहे.सुप्रसिध्द म्हैसूर दसरा महोत्सवाची प्रसिध्दी कन्नड व इंग्रजी या दोन्ही भाषेत केल्यामुळे देशी-विदेशी पर्यटकांच्या संख्येत मोठी वाढ झाली. याच धर्तीवर तुळजापुरातील सर्व उपक्रमांची प्रसिध्दी देखील मराठी व इंग्रजी या दोन्ही भाषेत करण्यात यावी, जेणेकरुन पर्यटनवृध्दीचे उद्दिष्ट साध्य करता येईल, असे परिपत्रकात नमूद केले आहे.
यंदाच्या नवरात्रीत स्थानिक लोककला, लोकनृत्ये, आई अंबाबाईचे गोंधळी गीत, भारुड, जाखडी, भजन स्पर्धा, कीर्तनाच्या कार्यक्रमांचे आयोजन करण्याचा निर्णय पर्यटन विभागाने घेतला आहे. महाराष्ट्र पर्यटन संचालनालयाच्या संकेतस्थळासह यूट्यूब चॅनेलवर त्याचे प्रक्षेपण केले जाणार आहे.
