मुंबई : नागपूरकर भोसल्यांची ऐतिहासिक तलवार लंडनमधून महाराष्ट्रात परत आली आहे. इतिहासाशी नवीन पिढीला जोडण्याची भूमिका श्रीमंत राजे रघुजी भोसले यांच्या या ऐतिहासिक तलवारीने पार पाडली आहे. यापुढेही हिंदवी स्वराज्याच्या, मराठा साम्राज्याच्या खुणा, प्रतीके परत आणण्याचे प्रयत्न सुरूच ठेवणार असल्याची ग्वाही मुख्यमंत्री देवेंद्र फडणवीस यांनी सोमवारी दिली.
मुख्यमंत्री फडणवीस यांच्या प्रमुख उपस्थितीत श्रीमंत सेना साहिब सुभा राजे रघुजी भोसले यांच्या ऐतिहासिक तलवारीचे प्रदर्शन आणि लोकार्पणाचा सोहळा प्रभादेवी येथील पु. ल. देशपांडे महाराष्ट्र कला अकादमीत पार पडला. यावेळी सांस्कृतिक कार्य मंत्री आशिष शेलार, श्रीमंत रघुजी भोसले यांचे वंशज मुधोजी राजे भोसले यांच्यासह अन्य मान्यवर उपस्थित होते.
नागपूरच्या भोसल्यांचा इतिहास हा पराक्रमाचा इतिहास असून, तो जास्तीत जास्त लोकांपर्यंत पोहोचवण्याची गरज आहे. नागपूरसह इतर ठिकाणी ही तलवार पोहोचेल आणि त्यामुळे आपल्या हिंदवी स्वराज्याचा विस्तार कसा झाला, याची साद्यंत माहिती नव्या पिढीपर्यंत पोहोचेल. पंतप्रधान नरेंद्र मोदी यांच्या नेतृत्वाखाली हजारो ऐतिहासिक वस्तू परत मिळवण्यात आल्या. त्याच धर्तीवर आपला वारसा परत आणू, असा विश्वास मुख्यमंत्री फडणवीस यांनी व्यक्त केला.
शौर्याचे, स्वराज्याचे प्रतीक
इंग्रजांच्या काळात लुटून नेलेल्या आपल्याच शौर्याच्या, पराक्रमाच्या, मराठा साम्राज्याच्या वैभवाची साक्ष देणारी प्रथम रघुजी राजे भोसले यांची तलवार अखेर महाराष्ट्रात परत आली आहे. ही केवळ एक वस्तू नाही, तर आपल्या पिढ्यांना प्रेरणा देणारे स्वराज्याचे प्रतीक असल्याचे सांस्कृतिक कार्यमंत्री शेलार म्हणाले. दरम्यान, याप्रसंगी मुख्यमंत्र्यांच्या हस्ते ‘मराठ्यांचा दरारा’ या पुस्तकाचे प्रकाशन करण्यात आले.
