भांडुप : मागील काही दिवस ऊसंत घेतलेल्या पावसाने बुधवार (दि.२५) मुंबई उपनगरात जोरदार हजेरी लावली. दिवसभर उघड झाप करीत असलेला पाऊस संध्याकाळी जोरदार बरसला. मुलुंड, भांडुप, विक्रोळी, घाटकोपर, कुर्ला, गोवंडी या परिसरात पावसाने जोरदार हजेरी लावली. यामुळे सखल भागात काही ठिकाणी पाणी देखील भरले.
भांडुपच्या कोकण नगर विभागात सखल भाग असल्याने मोठ्या प्रमाणात या भागात पाणी भरले होते. यामुळे काही काळ इथली वाहतूक विस्कळीत झाली होती. पावसामुळे दृश्यमान एकदम कमी झाल्याने पूर्व द्रुतगती मार्ग आणि एलबीएस मार्गावर वाहनांचा वेग मंदावला होता.संध्याकाळी घराकडे परतणाऱ्या चाकरमान्यांची पावसामुळे तारांबळ उडाली होती. अचानक आलेल्या पावसामुळे वातावरण थंडावले असले तरी नागरिकांची मात्र मोठी तारांबळ उडाली.
