मुंबई ः पंतप्रधान नरेंद्र मोदी यांनी योगाला अनन्य साधारण महत्त्व प्राप्त करून दिलेय आणि संपूर्ण जगाला आरोग्याची दिशा दिली. त्यामुळे आज संपूर्ण देशात, जगभरात योगा दिन साजरा केला जात आहे, असे प्रतिपादन भाजपा विधान परिषद गटनेते आ. प्रवीण दरेकर यांनी केले.
शनिवारी आंतरराष्ट्रीय योगदिनानिमित्त आ. प्रवीण दरेकर यांच्या नेतृत्वाखाली संजय गांधी राष्ट्रीय उद्यानातील कान्हेरी गुंफा येथे प्रथमच योगदिनाचे आयोजित करण्यात आले होते. याप्रसंगी उत्तर मुंबईचे खासदार पीयूष गोयल, भाजपा उपाध्यक्ष प्रकाश दरेकर, उत्तर मुंबई जिल्हा सचिव मोतीभाई देसाई, वॉर्ड अध्यक्ष अमित उतेकर, महिला वॉर्ड अध्यक्षा सोनाली नखुरे, वॉर्ड अध्यक्ष अविनाश राय यांसह मोठ्या प्रमाणात महिला व पुरुष उपस्थित होते. थेट दिल्लीहून खास योगदिनासाठी आलेले मंत्री गोयल, आ. प्रवीण दरेकर यांनी उपस्थित योगप्रेमी नागरिकांसह योगासने केली.
याप्रसंगी आ. दरेकर म्हणाले की, पंतप्रधान मोदी यांच्यामुळे गेली 11 वर्षे योग दिन साजरा होत आहे. त्याला आंतरराष्ट्रीय योग दिन म्हणून संपूर्ण जगाने मान्यता दिली. योगाच्या माध्यमातून जनतेच्या आरोग्याची काळजी करणारे पंतप्रधान या देशाला लाभले. निरोगी राहण्यासाठी रोज योगा करण्याला प्राधान्य दिल्यास आरोग्य चांगले राहील, असे आवाहनही दरेकर यांनी केले.
योगा हा पक्षाचा कार्यक्रम नाही. सर्वच पक्षाच्या लोकांनी यात सहभागी झाले पाहिजे. देशातील नागरिकांच्या आरोग्याची पंतप्रधान नरेंद्र मोदी काळजी घेताहेत. विरोधी पक्षातील नेत्यांचेही आरोग्य चांगले राहिले, तर आम्हालाही दोन हात करायला स्फूर्ती येईल, असा चिमटाही दरेकर यांनी विरोधकांना काढला.
