Pradeep Purneakar Murder: ठाण्यातील शिवसेना (उद्धव बाळासाहेब ठाकरे) पक्षाचे विभागप्रमुख प्रदीप पूर्णेकर यांची गोळ्या झाडून हत्या करण्यात आली. ही घटना गृहखात्याचे धिंडवडे काढणारी आहे. शिंदे गटाच्या मीनाक्षी शिंदे यांच्या विरोधात त्यांचा राजकीय संघर्ष सुरू होता; स्थानिक मनोरमानगर येथे बिल्डर लॉबी आणि ड्रग्ज नेटवर्कविरुद्ध ते सतत आवाज उठवत होते. त्याची किंमत त्यांनी जिवाचे मोल देऊन चुकवली आहे, असा आरोप शिवसेना (ठाकरे गट) खासदार संजय राऊत यांनी केला आहे.
सोशल मीडिया प्लॅटफॉर्म 'एक्स'वरील पोस्टमध्ये संजय राऊत यांनी म्हटले आहे की, "ठाणे हे गुन्हेगारांचे, ड्रग्ज माफियांचे आश्रयस्थान बनले आहे. देवेंद्र फडणवीसांचे हे अपयश असून ठाणेकरांचे भविष्य अंधारात ढकलले आहे. प्रदीप पूर्णेकरांचे बलिदान वाया जाऊ दिले जाणार नाही! लढवय्या शिवसैनिकाला दुःखाकुल अंतःकरणाने श्रद्धांजली."
ठाण्यात ठाकरे गटाच्या शिवसेनेचे विभाग प्रमुख प्रदीप पूर्णेकर यांची गोळ्या झाडून हत्या करण्यात आली. या घटनेचे सीसीटीव्ही फुटेज समोर आले आहे. त्यामध्ये दोन व्यक्ती दुचाकीवरून पुर्णेकर यांच्या कार्यालयाजवळ येताना दिसत आहेत. दोघांनीही हेल्मेट घातले होते. कार्यालयात प्रवेश केल्यानंतर त्यांनी पुर्णेकर यांच्यावर गोळीबार केला.पोलिसांच्या माहितीनुसार, हल्लेखोरांनी एकूण चार राऊंड फायर केले. त्यापैकी दोन गोळ्या पुर्णेकर यांना लागल्या. गोळीबारानंतर हल्लेखोरांनी त्यांच्यावर धारदार शस्त्राने वार केल्याची माहितीही समोर आली आहे.
या प्रकरणात पोलिसांनी पाच संशयित आरोपींची ओळख पटवली असून त्यापैकी दोन जणांना ताब्यात घेतले आहे. पप्या शिंदे आणि आकाश निमसे अशी ताब्यात घेतलेल्या आरोपींची नावे आहेत. इतर संशयितांचा शोध सुरू आहे.या प्रकरणाचा तपास ठाणे पोलीस करत आहेत. हल्ल्यामागील नेमके कारण काय होते आणि या हत्येमागे आणखी कोणाचा सहभाग आहे, याचा तपास सुरू आहे.
