Navi Mumbai intense rainfall, recording 187.97 mm in the last 24 hours
नवी मुंबई : महानगरपालिका क्षेत्रात गेल्या चोवीस तासांत पावसाने जोरदार हजेरी लावली असून, सरासरी 187.97 मिमी पावसाची नोंद झाली आहे. या धुवाधार पावसामुळे शहराला काहीसा दिलासा मिळाला असला तरी, ठिकठिकाणी पडझडीच्या घटनांमुळे प्रशासनाची धावपळ उडाली आहे.
गेल्या चौवीस तासात नवी मुंबई महानगरपालिका क्षेत्रात 187.97 मिमी पावसाची नोंद झाली आहे. बेलापूर विभागात 290.80 मिमी, नेरूळ विभागात 130.40 मिमी., वाशी विभागात 107.60 मिमी., कोपरखैरणे विभागात 162.40 मिमी, ऐरोली विभागात 213.20 मिमी, आणि दिघा विभागात 223.40 मिमी. पर्जन्यवृष्टी नोंदविली गेली आहे. यावर्षी आत्तापर्यंत नमुंमपा क्षेत्रात - 624.84 मिमी. इतकी पर्जन्यवृष्टी झालेली आहे. त्याचप्रमाणे मोरबे धरण क्षेत्रातही 2 जुलै रोजी सकाळी 8.30 वा. पर्यंत 154.40 मिमी. इतक्या पावसाची नोंद झालेली आहे.
मोरबे धरण क्षेत्रात समाधानकारक पाऊस; पाणी पातळीत वाढ
1 जूनपासून आतापर्यंत धरणक्षेत्रात 425.20 मिमी पाऊस झाला असून मोरबे धरणाची पातळी 69.67 M मीटर झाली असून, 26.90 टक्के पाणी साठा उपलब्ध आहे. मोरबे धरणातील पाण्याची पातळी दिवसेंदिवस खालावत चलली आहे याची चिंता व्यक्त करीत आपण सारे जण पावसाची आतुरतेने वाट बघत होतो. मात्र आता पाऊस आल्यानंतर मोरबेची पातळी वाढत आहे. शहरात चौवीस तासात ठिकठिकाणी आगीच्या 03, झाडे पडली - 32, पाणी साचणे- 05 आणि जखमी 02 अशा घटना घडल्या आहेत.
