नवी मुंबई : भारतीय विमानतळ आर्थिक नियामक प्राधिकरणाने विमानतळाच्या सुधारित व्हेरिएबल टॅरिफ प्लॅनला मंजुरी दिल्याने, नवी मुंबईहून नवीन आंतरराष्ट्रीय मार्ग सुरू करणाऱ्या विमान कंपन्यांना लँडिंग शुल्कात मोठ्या प्रमाणात सवलत मिळणार आहे. यामुळे अधिक विमान कंपन्या नवी मुंबई विमानतळाकडे आकर्षित होऊन थेट आंतरराष्ट्रीय मार्गांची संख्या वाढण्याची शक्यता आहे.
नवी मुंबई आंतरराष्ट्रीय विमानतळाने सादर केलेल्या सुधारित प्रस्तावानुसार, सवलतीसाठीची पात्रता ‘मुंबई महानगर प्रदेशातील नवीन मार्ग’ या निकषाऐवजी ‘नवी मुंबई आंतरराष्ट्रीय विमानतळावरून सुरू होणारा नवीन मार्ग’ अशी करण्यात आली आहे. त्यामुळे मुंबई महानगर प्रदेशातील विद्यमान विमानतळांवरून सुरू असलेल्या मार्गांपेक्षा NMIA वरून नव्याने सुरू होणाऱ्या आंतरराष्ट्रीय सेवांना प्रोत्साहन मिळणार आहे.
पहिल्या वर्षी १०० टक्के शुल्कमाफी
नवीन आंतरराष्ट्रीय प्रवासी मार्ग सुरू करणाऱ्या विमान कंपन्यांना पहिल्या वर्षी लँडिंग शुल्कात १०० टक्के सवलत मिळणार आहे. ५ हजार किलोमीटरपर्यंतच्या शॉर्ट-हॉल आंतरराष्ट्रीय मार्गांसाठी दुसऱ्या वर्षी ५० टक्के सवलत मिळेल. ५ हजार किलोमीटरपेक्षा अधिक अंतराच्या लाँग-हॉल मार्गांसाठी दुसऱ्या वर्षी ५० टक्के, तर तिसऱ्या वर्षी २५ टक्के सवलत देण्यात येणार आहे.
विद्यमान आंतरराष्ट्रीय मार्गांवर अतिरिक्त फेऱ्या सुरू करणाऱ्या विमान कंपन्यांनाही ७५ टक्क्यांपर्यंत सवलत मिळणार आहे. आंतरराष्ट्रीय मालवाहू विमानसेवांसाठी पहिल्या वर्षी ९० टक्के आणि दुसऱ्या वर्षी ५० टक्के लँडिंग शुल्क सवलत देण्यात येणार आहे.
तिकिटांच्या दरावरही परिणाम शक्य
या सवलतींचा थेट फायदा विमान कंपन्यांना होणार असला, तरी त्याचा परिणाम प्रवाशांच्या हवाई प्रवासावरही होण्याची शक्यता आहे. अधिक विमान कंपन्या आणि नवीन आंतरराष्ट्रीय मार्ग उपलब्ध झाल्यास नवी मुंबईतून थेट परदेश प्रवासाचे पर्याय वाढतील. विमान कंपन्यांमध्ये वाढणाऱ्या स्पर्धेमुळे प्रवाशांना अधिक गंतव्यस्थाने आणि किफायतशीर विमानभाड्याचे पर्याय मिळण्याची शक्यता आहे.
