मुंबई : मुंबईत भायखळा येथे वीरमाता जिजाबाई भोसले उद्यान व प्राणिसंग्रहालय (राणीबाग) लगत पहिले वस्त्रसंग्रहालय साकारत आहे. दोन टप्प्यांमध्ये हे काम करण्यात येणार असून पहिल्या टप्प्यातील म्युझिकल शो’चे काम प्रगतिपथावर आहे. या ‘म्युझिकल शो’मधून मुंबई व गिरणी कामगारांच्या इतिहासाचे दर्शन घडवण्यात येणार आहे.
मुंबई शहराला कापड गिरण्यांचा मोठा इतिहास होता. पण अनेक कापड गिरण्या बंद होऊन त्या ठिकाणी मोठमोठे मॉल व्यावसायिक गाळे व निवासी इमारती उभ्या राहत आहेत. त्यामुळे राज्य सरकार मुंबई महापालिका व राष्ट्रीय वस्त्रोद्योग मंडळाच्या पुढाकाराने काळाचौकी येथील इंडिया युनायटेड मिल येथे वस्त्रोद्योग संग्रहालय व सांस्कृतिक केंद्र निर्माण करण्यात येत आहे. इंडिया युनायटेड मिलच्या 64 हजार 947 चौ.मी. क्षेत्रफळाची जागा पुरातन वास्तूंसह, पुरातन सूचित समाविष्ट करण्यात आली आहे. यातील 44 हजार चौ. मीटर जागेवर मनोरंजन मैदान तसेच वस्त्रोद्योग संग्रहालय उभे राहत आहे.
वस्त्रसंग्रहालय तयार करण्याचे काम 2 टप्प्यांमध्ये करण्यात येणार आहे. संग्रहालयाच्या टप्पा-1 मधील आराखड्यांना मुंबई संस्कृती वारसा जतन समितीची डिसेंबर, 2017 मध्येच मंजुरी मिळाली. त्यामुळे संग्रहालयाच्या 44 हजार चौ.मी. जागेपैकी पहिल्या टप्प्यात 7 हजार चौ.मी. जागेवर सुशोभीकरण करण्यात येत आहे. फिजिकल फाउंटनवर प्रकाश व्यवस्थेमार्फत चित्रीकरणातून मुंबई व गिरणी कामगारांच्या इतिहासाचे दर्शन घडवण्यात येणार आहे. संग्रहालय परिसरात लँडस्केपिंग अंतर्गत रस्ते, कुंपण भिंतीला जीआरसी लावून ऐतिहासिक स्वरूप देणे, वारली चित्र काढणे तसेच अन्य कामे करण्यात येणार आहेत.
वस्त्र संग्रहालयाच्या टप्पा दोनच्या कामाचाही शुभारंभ झाला आहे. टप्पा-2 मध्ये उर्वरीत 37 हजार चौ.मी. जागेमध्ये वस्त्रोद्योग संग्रहालय, व संग्रहालय सहाय्यक व्यवस्था तयार करण्याचे काम करण्यात येणार असल्याचे पालिकेकडून सांगण्यात आले.
उन्हाळ्यात पाण्याची पातळी कमी होत असल्याने पाण्यात तरंगणार्या संगीत कारंज्यांच्या नोझल्सच्या कार्यप्रणालीमध्ये बिघाड होण्याची शक्यता आहे. तलावातील पाण्याची पातळी कमी झाल्यावर कूपनलिकेंमधून पाणी तलावात सोडण्यात येते. पण कुपनलिकेतील पाणी अशुद्ध असल्यामुळे तळ्यामध्ये मोठ्या प्रमाणात शेवाळ निर्माण होते. त्यामुळे कुपनलिकेचे पाणीही शुद्ध करण्यात येणार असल्याचे पालिकेकडून सांगण्यात आले.
