Child Swallowed Magnet: खेळण्यातील छोटे चुंबक ठरले जीवघेणे; २ वर्षीय चिमुकल्याने गिळले चुंबक

मुंबई: खेळण्यांमध्ये वापरले जाणारे छोटे चुंबक लहान मुलांसाठी जीवघेणे ठरू शकते, याचा धक्कादायक प्रकार समोर आला. दोन वर्षांच्या चिमुकल्याने दोन निओडिमियम चुंबक गिळल्याने लहान, मोठ्या आतड्यांना छिद्रे पडली.

या मुलाला सुरुवातीला ताप, पोटात कळा, उलट्या आणि जुलाबाचा त्रास होत होता. त्यामुळे पोटाचा संसर्ग झाल्याचा संशय होता. मात्र, ताप कायम राहण्यासह पोटाच्या उजव्या खालच्या भागात तीव्र वेदना होत असल्याने पुढील तपासण्या करण्यात आल्या.

अल्ट्रासाऊंडमध्ये अपेंडिसायटिसचा संशय आल्याने मुलाला तातडीने शस्त्रक्रियेसाठी नेण्यात आले. मुलाने चुंबक गिळल्याची माहिती पालकांना नव्हती. उपचारानंतर घरी खेळणी तपासली असता एका खेळण्यात याच प्रकारचे चुंबक असल्याचे आढळून आले.