Mumbai-born Biotech CEO Reshma Kewalramani
पुढारी ऑनलाईन डेस्क : वैद्यकीय क्षेत्रातून बायोटेक उद्योगात प्रवेश करत, संशोधनात सातत्याने नवनवीन उंची गाठणाऱ्या आणि नेतृत्वाच्या जोरावर अमेरिकेतील दिग्गज कंपनीचे भविष्य घडवणाऱ्या एका भारतीय महिलेने आता जागतिक मान्यता मिळवली आहे.
मुंबईत लहानपणी वाढलेल्या आणि अमेरिकेत जाऊन मेहनतीच्या जोरावर यशाची नवी व्याख्या ठरवणाऱ्या रेश्मा केवलरामाणी यांनी जगप्रसिद्ध ‘Fortune’ मासिकाच्या ‘100 सर्वाधिक शक्तिशाली व्यवसायिक व्यक्ती’च्या 2025 च्या यादीत स्थान मिळवून एक अभूतपूर्व कामगिरी केली आहे.
62व्या क्रमांकावर झळकणाऱ्या रेशमा या अमेरिकेतील मोठ्या बायोटेक कंपनीच्या पहिल्या महिला CEO ठरल्या असून, त्यांचा हा प्रवास प्रेरणादायी ठरत आहे – विशेषतः भारतीय महिलांसाठी, जे जागतिक व्यासपीठावर स्वतःचा ठसा उमटवू इच्छितात.
रेश्मा केवलरामाणी या अमेरिकेतील आघाडीची बायोटेक कंपनी Vertex Pharmaceuticals च्या CEO पदाची धुरा सांभाळत आहेत. रेश्मा केवळरामाणी या अमेरिकेतील मोठ्या बायोटेक कंपनीच्या CEO होणाऱ्या पहिल्या महिला आहेत.
2020 साली त्यांनी Vertex Pharmaceuticals या कंपनीचे मुख्य कार्यकारी अधिकारी म्हणून पदभार स्वीकारला आणि अल्पावधीतच कंपनीचा चेहरामोहरा बदलला. सध्या या कंपनीचे मूल्यांकन सुमारे $110 अब्ज (डॉलर) इतके आहे.
रेश्मा यांचा जन्म मुंबई येथे झाला. 11 वर्षांची असताना त्या कुटुंबासह अमेरिकेत स्थलांतरित झाल्या. वैद्यकीय शिक्षण पूर्ण करून त्यांनी Massachusetts General Hospital आणि Brigham and Women’s Hospital येथे डॉक्टर म्हणून आपल्या कारकिर्दीची सुरुवात केली.
नंतर त्यांनी बायोफार्मा क्षेत्रात प्रवेश केला. 2017 मध्ये Vertex मध्ये सामील झाल्यावर, 2018 मध्ये त्या कंपनीच्या Chief Medical Officer झाल्या. त्यानंतर अवघ्या दोन वर्षांत म्हणजे 2020 मध्ये त्या CEO बनल्या.
Fortune मासिकाने त्यांच्या यादीत रेश्मा यांच्या नेतृत्वगुणांवर प्रकाश टाकत विशेषतः ‘Journavx’ या नवीन आणि opioid-मुक्त वेदनाशामक औषधाच्या FDA मान्यतेचा उल्लेख केला. त्यांच्या वैद्यकीय पार्श्वभूमीचा प्रभाव कंपनीच्या संशोधन व नवोन्मेषावर स्पष्टपणे जाणवतो.
या यादीत भारतीय आणि भारतीय वंशाच्या इतर बड्या व्यक्तींमध्ये Microsoft चे CEO सत्य नडेला (क्र. 2), Google चे CEO सुंदर पिचाई (क्र. 6), Reliance चे अध्यक्ष मुकेश अंबानी (क्र. 56), YouTube चे CEO नील मोहन (क्र. 83), आणि Adani Group चे अध्यक्ष गौतम अदानी (क्र. 96) यांचा समावेश आहे.
रेश्मा केवलरामाणी यांची ‘Fortune 100’ यादीतील ही पहिलीच एन्ट्री असली तरी त्यांचे जागतिक नेतृत्वामधील स्थान आता अधिक बळकट झाले आहे. एक भारतीय वंशाची महिला CEO म्हणून त्यांनी अमेरिकेतील आणि जागतिक बायोटेक उद्योगात महत्वपूर्ण ठसा उमटवला आहे.
