मुंबई: मुंबई महानगरपालिकेतील २२५ अभियंत्यांच्या बदल्या आणि नियुक्त्या राजकीय शिफारशीनुसार झाल्याचे मंगळवारी उघडकीस आल्यानंतर पालिका प्रशासनाने गंभीर दखल घेतली आहे.
आता यापुढे महापालिकेतील प्रत्येक अभियंत्याची बदली ही ऑनलाइन बदली प्रणालीद्वारे होणार आहे. यामुळे मोठ्या प्रमाणात राजकीय पत्रांच्या शिफारशींना चाप बसणार आहे.
माहिती अधिकार कार्यकर्ते अनिल गलगली यांनी महापालिकेत, बदली झालेल्या २२५ अभियंत्यांसाठी मंत्री, आमदार आणि उपमहापौर यांच्या पत्रांच्या शिफारशी केल्याचे माहिती अधिकारातून समोर आणले होते.
मुंबई महानगरपालिका आता ऑनलाइन बदली प्रणाली सुरू करण्याच्या दिशेने पुढे जात आहे. मुंबई महापालिकेतील बदली प्रक्रियेत पारदर्शकता व उत्तरदायित्व आणण्यासाठी हा अत्यंत महत्त्वाचा निर्णय ठरणार आहे.
२२५ अधिकारी व कर्मचाऱ्यांच्या बदल्यांसाठी राजकीय शिफारशींचा उल्लेख झाल्याच्या पार्श्वभूमीवर ऑनलाइन बदली प्रणालीची आवश्यकता अधिक अधोरेखित झाली आहे.
