मुंबई : तापमानात वाढ झाली असली तरी मुंबई शहर आणि उपनगरांमधील हवा गुणवत्ता (एक्यूआय) बिघडलेलीच आहे. बुधवारी सरासरी हवा गुणवत्ता निर्देशांक (एक्यूआय) 166 इतका नोंदवला गेला.
मुंबईवर प्रदूषणाचे ढग कायम आहेत. प्रमुख स्टेशनांचा आढावा घेतल्यास हिरानंदानी गार्डन (191), चेंबूर-पश्चिम (184) भक्ती पार्क - वडाळा (185) तसेच मराठा कॉलनी - विलेपार्ले (179) या भागात वाढते प्रदूषण आहे. गेले काही दिवस मुंबईत अंशतः ढगाळ वातावरण आणि धुके जाणवत आहे.
दरम्यान , बुधवारी नवी मुंबईतील हवा गुणवत्ता निर्देशांकही सरासरी 186 पर्यंत नोदवला गेला आहे. प्रदूषणाची पातळी वाढत असताना शहर आणि उपनगरांतील काही भागांमध्ये दृश्यमानता कमी झाली आहे. त्यामुळे शहराचा वायू प्रदूषणाशी सुरू असलेला संघर्ष अधोरेखित झाला आहे. 151 ते 200 मधील एक्यूआय हा आरोग्यासाठी घातक हवेची कॅटेगरी आहे.
वाढत्या प्रदूषणाच्या दीर्घकाळ संपर्कात राहिल्याने श्वसनाच्या आजारांनी डोके वर काढले आहे. विशेषतः मुले, वृद्ध आणि फुफ्फुसांचे आजार असलेल्या लोकांना अशा वातावरणाचा खूप त्रास होत आहे.
