मुंबई : खेळण्यासाठी मोबाईल देतो, असे सांगून एका सात वर्षांच्या मुलावर त्याच्याच शेजारी राहणार्या 35 वर्षांच्या आरोपीने अनैसर्गिक लैंगिक अत्याचार केल्याची घटना सांताक्रूझ परिसरात घडली. याप्रकरणी अनैसर्गिक लैंगिक अत्याचारासह पोक्सोच्या विविध कलमांतर्गत गुन्हा दाखल होताच आरोपीस सांताक्रूझ पोलिसांनी अटक केली आहे. याच गुन्ह्यांत तो सध्या पोलीस कोठडीत असून त्याची पोलिसांकडून चौकशी सुरू आहे.
35 वर्षांचे तक्रारदार सांताक्रूझ परिसरात राहात असून त्याना सात वर्षांचा मुलगा आहे. याच परिसरात 35 वर्षांचा आरोपी राहात असून ते एकमेकांच्या परिचित आहेत. शनिवारी सकाळी साडेनऊ वाजता त्यांचा मुलगा घराजवळ बसला होता. यावेळी त्याच्या शेजारीच राहणारा आरोपी तिथे आला. त्याने बळीत मुलाला मोबाईल खेळण्यासाठी देतो असे सांगून त्याच्या घरी बोलावून घेतले होते. घरी गेल्यानंतर त्याने तिच्याशी जवळीक साधण्याचा प्रयत्न केला होता. काही वेळानंतर त्याने त्याच्यासोबत अनैसर्गिक लैंगिक अत्याचार केला होता. हा प्रकार कोणालाही सांगू नकोस, असे सांगून त्याने त्याला घरी पाठविले होते.
या घटनेनंतर त्याला प्रचंड वेदना होऊ लागल्या होत्या, त्यामुळे त्याच्या वडिलांनी त्याची विचारपूस केली असता त्यांना त्यांच्या मुलाकडून घडलेला प्रकार समजला होता. ही माहिती ऐकून त्यांना धक्काच बसला होता. त्यानंतर त्यांनी सांताक्रूझ पोलिसांना घडलेला प्रकार सांगितला. त्यांच्या तक्रारीनंतर पोलिसांनी आरोपीविरुद्ध अनैसर्गिक लैंगिक अत्याचारासह पोक्सोच्या विविध कलमांतर्गत गुन्हा दाखल केला होता. गुन्हा दाखल होताच 35 वर्षांच्या आरोपीस पोलिसांनी अटक केली. अटकेनंतर त्याला विशेष सत्र न्यायालयात हजर करण्यात आले होते. यावेळी न्यायालयाने त्याला पोलीस कोठडी सुनावली आहे.
