मुंबई : पुढारी वृत्तसेवा
राज्य पोलीस दलातील कृत्रिम बुद्धिमत्तेच्या वापरासाठी महाराष्ट्र रिसर्च अॅण्ड व्हिजिलन्स फॉर एनहान्स्ड लॉ एन्फोर्समेंट लि (मार्वल ) कंपनी स्थापन करण्यात आली असून या कंपनीला आता राज्यातील शासकीय व निमशासकीय कार्यालयांमध्ये कृत्रिम बुद्धिमत्तेचा प्रभावी वापर व्हावा, यासाठीचे काम देण्यात येणार आहे. विशेष म्हणजे, शासकीय माहिती गोपनीय व सुरक्षित ठेवण्यासाठी ही कंपनी मदत करणार आहे.
मार्वल या कंपनीला पोलीस दलाप्रमाणे शासकीय आणि निमशासकीय कार्यालयात कृत्रिम बुद्धिमत्तेच्या वापरासाठीचे काम देण्यात येणार आहे. या कंपनीच्या कामाची व्याप्ती वाढवण्यासठी उच्चस्तरीय समिती स्थापन करण्याचा निर्णय राज्य मंत्रिमंडळ बैठकीत घेण्यात आला आहे.
राज्य पोलीस दलातील कृत्रिम बुद्धिमत्तेच्या वापरासाठी महाराष्ट्र रिसर्च अँण्ड व्हिजिलन्स फॉर एनहान्स्ड लॉ एन्फोर्समेंट लि.-(मार्वल) ही कंपनी २०२४ मध्ये स्थापन करण्यात आली आहे. आता राज्यातील विविध शासकीय व निमशासकीय कार्यालये, तसेच विभागांनी कृत्रिम बुद्धिमत्ता तंत्रज्ञानाशी निगडीत विविध प्रकल्प राबवण्याचे नियोजन केले जात आहे. या प्रकल्पांमध्ये शासकीय माहिती गोपनीय व सुरक्षित रहावी, यादृष्टीने मार्वल कंपनी मदत करणार आहे. त्यासाठी या कंपनीच्या कामाची व्याप्ती वाढविण्यात येणार आहे.
कोणते प्रकल्प या कंपनीकडे द्यायचे हा निर्णय ही समिती घेईल. ते मार्गी लावण्यासाठी मुख्य सचिवांच्या अध्यक्षतेखाली तसेच संबंधित विभागांच्या सचिवांची शक्ती प्रदान समिती स्थापन करण्यास मान्यता देण्यात आली. ही समिती प्रकरणनिहाय तपासणी करून प्रकल्पांबाबत निर्णय घेणार आहे.
