मुंबई : पैशाचे सोंग आणता येत नसल्यामुळे राज्य सरकारची आर्थिक परिस्थिती सुधारल्यानंतर मुख्यमंत्री माझी लाडकी बहीण योजनेतील लाभार्थ्यांना वाढीव मदत देण्यात येईल, असे स्पष्टीकरण उपमुख्यमंत्री अजित पवार यांनी गुरुवारी विधानसभेत दिले.
अर्थखाते सांभाळणाऱ्या अजित पवार यांनी कठीण आर्थिक परिस्थितीची कबुली दिल्याने या योजनेतील पात्र लाडक्या बहिणींना २,१०० रुपयांच्या मदतीसाठी अजून प्रतीक्षा करावी लागणार आहे. २०२५-२६ च्या अर्थसंकल्पातील वित्त, नियोजन, अन्न आणि नागरी पुरवठा विभागाच्या अनुदानाच्या मागण्या विधानसभेत मंजूर करण्यात आल्या. तत्पूर्वी, झालेल्या चर्चेला उत्तर देताना अजित पवार यांनी लाडकी बहीण योजनेतील लाभार्थ्यांना वाढीव अनुदान देण्याच्या मागणीवर सरकारची भूमिका स्पष्ट केली. सध्या आम्ही लाडक्या बहिणींना कबूल केल्याप्रमाणे मदत देत आहोत. वाढीव मदतीची मागणी होत असली, तरी आर्थिक परिस्थिती सुधारल्यानंतर आम्ही वाढीव मदत देऊ, असे त्यांनी सांगितले.
लॉटरीच्या माध्यमातून राज्याचे उत्पन्न वाढावे यासाठी विधानसभा सदस्यांची समिती नेमण्याची घोषणाही पवार यांनी केली. या समितीने अभ्यास करून महिनाभरात अहवाल द्यावा, असे पवार म्हणाले. भाजपचे ज्येष्ठ आमदार सुधीर मुनगंटीवार यांनी या चर्चेत भाग घेताना राज्य सरकारने लॉटरीच्या माध्यमातून उत्पन्न वाढवण्याची सूचना केली होती. त्यासाठी त्यांनी केरळसह अन्य राज्यांना लॉटरीपासून मिळणाऱ्या महसुलाची माहिती दिली.
