मुंबई: आठ वर्षांच्या अल्पवयीन मुलीशी अश्लील चाळे करुन तिचा विनयभंग केल्याप्रकरणी एका २२ वर्षांच्या आरोपी तरुणाला जोगेश्वरी पोलिसांनी अटक केली.
रमेश असे या आरोपीचे नाव असून त्याचा कपड्याचा व्यवसाय आहे. त्याच्याविरुद्ध विनयभंगासह पोक्सो कलमांतर्गत कारवाई करण्यात आली असून याच गुन्ह्यांत त्याला दिडोंशीतील विशेष सत्र न्यायालयात हजर करण्यात आले होते.
३३ वर्षांचे तक्रारदार जोगेश्वरी येथे राहत असून बळीत आठ वर्षांची त्यांची मुलगी आहे. रविवारी ७ जूनला रात्री साडेदहा वाजता त्यांची मुलगी शिवलिला हॉटेलच्या दिशेने जात होती. जोगेश्वरीतील स्टेशन रोड, इस्माईल युसूफ कॉलेज गेटसमोरुन जात असताना आरोपीने पाठलाग करुन मागून नकोसा अश्लील स्पर्श करुन तिचा विनयभंग केला. त्यानंतर आरोपी तेथून पळून गेला होता.
हा प्रकार नंतर तिने तिच्या पित्याला सांगितल्यानंतर त्यांनी जोगेश्वरी पोलिसांत तक्रार दिली. त्यांच्या तक्रारीवरुन पोलिसांनी आरोपीविरुद्ध विनयभंगासह पोक्सो कलमांतर्गत गुन्हा दाखल केला होता. गुन्हा दाखल होताच पोलिसांनी आरोपीचा शोध सुरू केला.
त्याला रात्री उशिरा त्याच्या राहत्या परिसरातून पोलिसांनी अटक केली. अटकेनंतर त्याला सोमवारी दिडोंशीतील सत्र न्यायालयात हजर करण्यात आले होते, यावेळी न्यायालयाने त्याला पोलीस कोठडी सुनावली आहे.
