जोगेश्वरी: गणेशोत्सवाच्या धामधुमीत मुंबई महानगरपालिकेच्या निष्काळजीपणाचा आणि ढिसाळ नियोजनाचा एक अतिशय भीषण आणि हृदयद्रावक घटना शनिवारी मध्यरात्री साडे बाराच्या दरम्यान गौरी गणपती विसर्जनादरम्यान जोगेश्वरी पूर्वेला घडली.
शामनगर परिसरात लोकमान्य टिळक गणेश विसर्जन तलावाच्या बाहेर लिली व्हाईट इमारतीजवळ उभारण्यात आलेल्या कृत्रिम पाँड मध्ये गणपतीचे विसर्जन सुरू असतानाच विजेचा शॉक लागून रोहित भीमसिंग राठोड या अवघ्या १९ वर्षांच्या निष्पाप तरुणाचा जागीच दुर्दैवी मृत्यू झाला.
आईचे छत्र आधीच हरपलेल्या या तरुणाच्या जाण्याने त्याच्या वृद्ध वडिलांवर दुःखाचा डोंगर कोसळला असून, जोगेश्वरी परिसरात तीव्र संताप व्यक्त केला जात आहे.
गणेश विसर्जन सुरू असताना विसर्जन स्थळावरील पाण्याच्या पाँड मधील यंत्रणेत अचानक विद्युत प्रवाह (करंट) उतरला. यामध्ये रोहित राठोड हा तरुण गंभीररीत्या होरपळला. त्याला तात्काळ नजीकच्या ट्रॉमा केअर हॉस्पिटलमध्ये नेण्यात आले, मात्र डॉक्टरांनी त्याला तपासून मृत घोषित केले.
