मुंबई : मुंबई आणि नवी मुंबई विमानतळाचे व्यवस्थापन पाहणाऱ्या अदानी एअरपोर्ट होल्डिंग्स लिमिटेडशी अनेक आठवडे सुरू असणाऱ्या चर्चेत एक दिलासा मिळाला आहे.
इंडिगो आणि एअर इंडिया समूह डिसेंबर २०२६ पासून आपली काही आंतरराष्ट्रीय उड्डाणे छत्रपती शिवाजी महाराज आंतरराष्ट्रीय विमानतळावरून नवी मुंबई आंतरराष्ट्रीय विमानतळावर हलवण्यास तयार झाले आहेत. सध्या ही विमाने मुंबई विमानतळाच्या टर्मिनल २ वरून झेपावत आहेत.
इंडिगो आणि अदानी एअरपोर्ट होल्डिंग्स लिमिटेड यांनी रविवारी फेब्रुवारी ते जुलै २०२७ दरम्यान एनएमआयए येथून आंतरराष्ट्रीय सेवांचा टप्प्याटप्प्याने विस्तार करण्याची घोषणा केली. या स्थलांतरामध्ये बहरीन, रियाध, दम्माम, जेद्दाह, मदिना, कुवैत, रास अल खैमाह, फुजैराह, मस्कत, ढाका आणि जकार्ता या सध्या सीएसएमआयए येथून चालवल्या जाणाऱ्या उड्डाणांचा समावेश असेल.
इंडिगो एनएमआयए येथून काठमांडूसाठी दररोज एक सेवाही सुरू करेल, ज्यामुळे या विमानतळावरून तिची एकूण आंतरराष्ट्रीय उड्डाणे दररोज १२ वर पोहोचतील. ही विमान कंपनी आपल्या आंतरराष्ट्रीय सेवांना पाठबळ देण्यासाठी आणि प्रवाशांच्या पुढील प्रवासाची जोडणी सुलभ करण्यासाठी देशांतर्गत उड्डाणांचा काही भाग एनएमआयए येथे हलवेल.
याशिवाय, एअर इंडिया एक्सप्रेस डिसेंबर २०२६ पासून एनएमआयए येथून दररोज चार देशांतर्गत उड्डाणे चालवेल. कंपनीने जानेवारी २०२७ पासून कुवैतसाठी सेवा सुरू करण्याचे आणि ओमानसाठी सध्या सुरू असलेल्या सेवा चालवण्याचे नियोजन केले आहे. या समूहाचे ऑक्टोबर २०२७ पर्यंत जेद्दाह, मस्कत, रियाध आणि शारजाह या आंतरराष्ट्रीय गंतव्य स्थानांसाठीच्या उड्डाणांचे एनएमआयएवर टप्प्याटप्प्याने स्थलांतर पूर्ण करण्याचे उद्दिष्ट आहे. कुवेत सेवांचे प्रस्तावित स्थलांतर आवश्यक मंजुरींच्या अधीन आहे.
