नवी मुंबई: गणेशोत्सवातील ६ विसर्जन दिवसांमध्ये २२ नैसर्गिक व १५६ कृत्रिम विसर्जन स्थळांवर ठेवलेल्या निर्माल्य कलशात ७१ टन ९९० किलो निर्माल्य जमा झाले. या निर्माल्यापासून आता उद्यानांसाठी खतनर्मिती केली जाणार आहे.
हे निर्माल्य संकलित करण्यासाठी महापालिकेच्या वतीने स्वतंत्र निर्माल्य वाहतुक वाहनांची व्यवस्था करण्यात आली होती.
गणेशोत्सवात विसर्जनस्थळी येणाऱ्या पुष्पमाळा, फुले, दुर्वा, तुळस, शमी, फळांच्या साली-तुकडे यासारखे पुनर्प्रक्रिया करण्यायोगे 'ओले निर्माल्य' तसेच मुर्तीच्या गळ्यातील कंठी, सजावटीचे सामान असे 'सुके निर्माल्य' ठेवण्यासाठी महापालिकेच्या वतीने वेगवेगळ्या निर्माल्य कलशांची व्यवस्था केली होती.
यावर्षीच्या श्रीगणेशोत्सव विसर्जन कालावधीत गौरींसह सातव्या दिवसाच्या विसर्जनाप्रसंगी सर्वाधिक २५,९९० टन तसेच दीड दिवसांच्या विसर्जनदिनी १४,५१० टन निर्माल्य आणि अनंतचतुर्दशीदिनी दहाव्या दिवसाच्या विसर्जनप्रसंगी १०, ९५० टन निर्माल्य संकलित करण्यात आले.
पाचव्या दिवाशी १२,५५५ टन तसेच सातव्या दिवशी ७१५५ किलो आणि १० व्या दिवशी ८७० किलो निर्माल्य गोळा झाले.
हे निर्माल्यावर शास्त्रोक्त खत निर्मिती प्रक्रिया केली जात आहे. यामधून महापालिका क्षेत्रातील उद्याने फुलविली जाणार आहेत.
