मुंबई : शासकीय बैठकांकडे पाठ फिरविण्याचा उपमुख्यमंत्री एकनाथ शिंदे यांचा सिलसिला चालूच आहे. बुधवारी मुख्यमंत्री देवेंद्र फडणवीस यांनी नगरविकास खात्याशी संबंधित विषयांसाठी बोलवलेल्या बैठकीला उपमुख्यमंत्री शिंदे अनुपस्थित राहिले.
यापूर्वी, एकनाथ शिंदे हे एका मंत्रिमंडळ बैठकीला अनुपस्थित होते. तसेच, अनेक विभागांच्या १०० दिवसांच्या आढावा बैठकीसही शिंदे अनुपस्थित होते. तर, उपमुख्यमंत्री अजित पवार यांनी मंगळवारी बोलावलेल्या जिल्हा वार्षिक योजनेच्या बैठकीला एकनाथ शिंदे हजर होते.
नगरविकास खात्याच्या अखत्यारितील चार शहरांच्या महानगर विकास प्राधिकरणाची बैठक मुख्यमंत्री फडणवीस यांनी बोलावली होती. सह्याद्री अतिथीगृहात बुधवारी दुपारी पुणे, नाशिक, नागपूर आणि छत्रपती संभाजीनगर या शहरांच्या विकास प्राधिकरणाची बैठक बोलावण्यात आली होती. तर, तत्पूर्वी नगरविकास खात्याशी संबंधात नाशिक महापालिका सांडपाणी प्रक्रिया प्रकल्पाबाबतही मुख्यमंत्र्यांनी बैठक बोलवली होती. या दोन्ही बैठका नगरविकास खात्याशी संबंधित होत्या, त्यामुळे शिंदे स्वतः या बैठकांना उपस्थित राहतील असा अंदाज होता मात्र, एकनाथ शिंदे यांनी या बैठकांऐवजी मलंगगडाच्या कार्यक्रमाला उपस्थिती लावली. शासकीय बैठकांसाठी मलंगगडाच्या कार्यक्रमाची वेळ बदलणे शक्य असतानाही शिंदे यांनी तसे केले नाही. या बैठकीला उपमुख्यमंत्री तथा वित्तमंत्री अजित पवार, महसूल मंत्री चंद्रशेखर बावनकुळे उपस्थित होते. दरम्यान, मंगळवारच्या राज्य मंत्रिमंडळ बैठकीतही शिवसेना शिंदे गटाच्या मंत्र्यांनी आपल्या खात्यात हस्तक्षेप होत असल्याची तक्रार मुख्यमंत्र्यांकडे केली. त्यानंतर आता आपल्याच खात्याशी संबंधित बैठकांकडे उपमुख्यमंत्री शिंदे अनुपस्थित राहिल्यामुळे महायुतीत विशेषतः शिवसेना आणि भाजपतील मतभेद वाढत असल्याची चर्चा सुरू आहे.
