मुंबई: दादर प शिवाजी पार्क परिसरात काल शनिवार दि 30 मे रोजी मनपा कर्मचाऱ्यांकडून वृक्षछाटणी सुरूअसताना अनवधानाने गॅस पाईपलाईन फुटल्याची घटना घडली. या घटनेमुळे परिसरात काही काळ घबराटीचे वातावरण निर्माण झाले होते. मात्र, संबंधित यंत्रणांनी तत्काळ घटनास्थळी धाव घेत परिस्थिती नियंत्रणात आणल्याने कोणतीही जीवितहानी झाली नाही.
खोदकाम सुरू असताना अचानक गॅस पाईपलाईनला धक्का लागून गॅस गळती सुरू झाली. गॅसचा तीव्र वास परिसरात पसरल्याने नागरिकांनी तातडीने अग्निशमन दलाला पाचरण केले. सुरक्षेच्या दृष्टीने परिसरातील नागरिकांना काही काळ सुरक्षित अंतरावर हलविण्यात आले.
जवळपास एक तासाच्या प्रचंड मेहनतीने गॅसगळती रोखण्यात अग्निशमन दलाला यश आले आणि मोठा अनर्थ टळला.या घटनेमुळे परिसरातील वाहतुकीवर काही काळ परिणाम झाला. सुदैवाने या घटनेत कोणतीही जीवितहानी किंवा मोठे नुकसान झाले नाही.
