पुढारी ऑनलाईन डेस्क : महाराष्ट्राचे उपमुख्यमंत्री एकनाथ शिंदे यांच्यावर केलेल्या विडंबनात्मक गाण्यामुळे स्टँडअप कॉमेडियन कुणाल कामरा याच्याविरोधात मुंबईतील खार पोलीस ठाण्यात तीन वेगवेगळे गुन्हे दाखल झाले आहेत. मुंबई पोलिसांच्या माहितीनुसार, जळगाव शहराच्या महापौरांनी एक तक्रार दाखल केली असून, नाशिकमधील एका हॉटेल व्यावसायिक आणि एका उद्योजकाने अन्य दोन तक्रारी नोंदवल्या आहेत. खार पोलिसांनी कामरा याला दोन वेळा चौकशीसाठी बोलावले, मात्र त्याने हजेरी लावलेली नाही.
यापूर्वी, मद्रास उच्च न्यायालयाने कामरा याला विविध एफआयआरच्या संदर्भात ७ एप्रिलपर्यंत अटकेपासून अंतरिम संरक्षण दिले आहे. कामरा याने तात्पुरती जामीन मिळावा म्हणून न्यायालयात धाव घेतली होती, कारण त्यांच्या विडंबनात्मक गाण्यानंतर त्याला धमक्या मिळत असल्याचे त्यांनी सांगितले. २७ मार्च रोजी मुंबई पोलिसांनी त्याला ३१ मार्च रोजी खार पोलीस ठाण्यात चौकशीसाठी हजर राहण्यास सांगितले आहे. त्याला बजावण्यात आलेले हे तिसरे समन्स आहे, यापूर्वी शिवसेना आमदार मुरजी पटेल यांनी दिलेल्या तक्रारीवरून त्याला दोन वेळा चौकशीसाठी बोलावले होते, मात्र तो हजर राहिला नाही. दरम्यान, मुख्य प्रवाहातील माध्यमांवर टीका करताना कामरा याने त्यांना सत्ताधारी पक्षाचे ‘प्रचार यंत्रणा’ असल्याचा आरोप केला.
"मुख्य प्रवाहातील मीडिया सध्या सत्ताधारी पक्षाची फक्त गैरसमज पसरवणारी शाखा आहे. ते अशा गोष्टींवर बातम्या देतात ज्या जनतेच्या जीवनाशी संबंधित नसतात. जर त्यांनी उद्यापासून कायमचे आपले दुकान बंद केले, तर ते देश, जनता आणि त्यांच्या स्वतःच्या मुलांसाठीही चांगले ठरेल," अशी पोस्ट कामरा याने ‘एक्स’ वर केली आहे. त्याने त्याच्या विडंबनात्मक गाण्यात "गद्दार" शब्दाचे उल्लेख केल्यामुळे वाद निर्माण झाला आहे. अनेक नेत्यांनी त्याच्या या कृतीचा निषेध केला असून, त्यांच्या विरोधात कारवाईची मागणी केली आहे. या वादानंतर एकनाथ शिंदे यांच्या युवा सेनेने ‘हॅबिटॅट’ या विनोद मंचावर तोडफोड केली, जिथे कामराने हा शो केला होता. भाजप-प्रणीत केंद्र सरकारविरोधात टीका करण्यासाठी ओळखल्या जाणाऱ्या कामरा याने मात्र माफी मागण्यास नकार दिला आहे.
"एक विनोद मंच ही केवळ एक जागा आहे, जिथे विविध प्रकारचे कार्यक्रम सादर होतात. हॅबिटॅट (किंवा कोणताही अन्य मंच) माझ्या विनोदासाठी जबाबदार नाही, तसेच तो मला काय म्हणायचे यावर नियंत्रण ठेवू शकत नाही. तसेच, कोणत्याही राजकीय पक्षालाही त्यावर हक्क नाही. असे कामराने स्पष्ट केले. कामराने काही नेत्यांनी दिलेल्या ‘धडा शिकवू’ अशा धमक्यांनाही प्रत्युत्तर दिले आहे. "सत्ताधाऱ्यांची खिल्ली उडवण्याचा अधिकार संविधानाने दिला आहे. तुम्हाला विनोद समजत नसला, तरी त्यामुळे माझ्या अभिव्यक्ती स्वातंत्र्यावर गदा येणार नाही," असे त्याने म्हटले आहे.
