मुंबई: सिडको (CIDCO) वसाहतींमधील नागरिकांसाठी एक अत्यंत आनंदाची बातमी आहे. सिडकोने बांधलेल्या तब्बल १७ हजार घरांच्या किमतीत अखेर १० टक्क्यांनी कपात करण्याचा महत्त्वाचा निर्णय घेण्यात आला आहे. ही घोषणा राज्याचे उपमुख्यमंत्री एकनाथ शिंदे यांनी केली आहे. या निर्णयामुळे आर्थिकदृष्ट्या दुर्बळ घटक (EWS) आणि मध्यम उत्पन्न गट (MIG) प्रवर्गातील हजारो नागरिकांना मोठा फायदा होणार आहे.
घरांच्या वाढलेल्या किमती कमी करण्यात याव्यात, या मागणीसाठी अनेक नागरिक आणि लोकप्रतिनिधींनी सातत्याने आवाज उचलला होता. या मागणीसाठी आमदार विक्रांत पाटील यांनी मोठे आंदोलन केले होते. त्यांच्यासह अन्य लोकप्रतिनिधी आणि नागरिकांच्या या प्रयत्नांना अखेर यश आले आहे. उपमुख्यमंत्र्यांनी या मागणीची दखल घेत त्वरित किमती कमी करण्याचा निर्णय जाहीर केला.
सिडकोच्या या महत्त्वपूर्ण निर्णयाचा थेट फायदा खालील प्रमुख नोडस् (शहरांमधील) येथील नागरिकांना होणार आहे, जिथे सिडकोने घरे बांधली आहेत. यामध्ये खारघर, वाशी, खारकोपर, तळोजा, उलवे, कळंबोली, कामोठे आणि पनवेलचा समावेश आहे. या सर्व भागांतील सुमारे १७ हजार घरांच्या किमती कमी होणार असल्याने, घर खरेदी करणाऱ्या नागरिकांना मोठी आर्थिक मदत मिळणार आहे. सिडकोच्या या निर्णयामुळे स्वतःच्या हक्काचे घर घेण्याचे स्वप्न पाहणाऱ्या अनेक कुटुंबांना मोठा दिलासा मिळाला आहे.
