मुंबई ः बुलेट ट्रेनची चाचणी 2026 च्या अखेरीस सुरू होईल. ही चाचणी सुरत-बिलिमोरा सेक्शनवर होईल. बुलेट ट्रेन कॉरिडॉरवर वंदे भारत चालवले जाणार नाही. केंद्र सरकारने सोमवारी ही माहिती दिली. दरम्यान, घनसोली-शिळफाटा या टप्प्यातील समुद्राखालील 21 कि.मी. बोगद्याचे काम पूर्ण झाल्याची माहिती रेल्वे मंत्रालयाने दिली.
भारतातील पहिल्या बुलेट ट्रेनची चाचणी जपानमध्ये सुरू झाली आहे. ही चाचणी मुंबई-अहमदाबाद हाय-स्पीड रेल कॉरिडॉरसाठी केली जात आहे. रेल्वे मंत्रालयातील सूत्रांनी सांगितले की, 2026 च्या सुरुवातीला जपान भारताला दोन शिंकान्सेन ट्रेन भेट देईल, ज्या भारतीय हवामान आणि भौगोलिक परिस्थितीनुसार चाचण्या घेतील. 2029 पर्यंत संपूर्ण कॉरिडॉरवर नियमित सेवा सुरू होण्याची शक्यता आहे.
जपानच्या शिंकानसेन ए3 आणि ए5 मालिकेतील दोन गाड्यांच्या यशस्वी चाचण्यांनंतर, ए10 बुलेट ट्रेन व्यावसायिक ऑपरेशनसाठी रुळावर आणली जाईल. हा प्रकल्प जपानच्या शिंकानसेन तंत्रज्ञानावर आधारित आहे, जो त्याच्या सुरक्षितता आणि विश्वासार्हतेसाठी जगप्रसिद्ध आहे.
सिग्नलिंगसाठी कंपनीला निविदा देखील देण्यात आली आहे. या प्रकल्पाची एकूण किंमत 1.08 लाख कोटी रुपये आहे. बुलेट ट्रेनचा कमाल वेग 350 किमी/तास असेल; परंतु ट्रेन 320 किमी/तास वेगाने धावेल. अशा प्रकारे, मुंबई-अहमदाबादचे 508 कि.मी. अंतर 2 तास 7 मिनिटे (मर्यादित थांबा) किंवा 2 तास 58 मिनिटांत (सर्व थांबे) पूर्ण केले जाईल.
दिल्ली-मुंबई-अहमदाबाद व्यतिरिक्त, भविष्यात आणखी सहा मार्गांवर बुलेट ट्रेन चालवण्याची योजना आहे. या सर्व सहा मार्गांवर व्यवहार्यता अहवाल तयार करण्यात आला आहे. रेल्वेनुसार, मुंबई-पुणे, मुंबई-नाशिक, मुंबई-हैदराबाद, हावडा-वाराणसी, दिल्ली-अमृतसर, दिल्ली-अहमदाबाद दरम्यान बुलेट ट्रेन चालवल्या जातील. या सर्व सहा मार्गांचा डीपीआर तयार करण्याची प्रक्रिया देखील सुरू झाली आहे.
मुंबई-अहमदाबाद दरम्यान दोन प्रकारच्या बुलेट ट्रेन धावतील. एक प्रीमियम सेवेची असेल. ती मुंबई आणि अहमदाबाद दरम्यान फक्त 4 स्थानकांवर थांबेल, तर सामान्य बुलेट ट्रेन 12 स्थानकांवर थांबेल.
