पुढारी ऑनलाईन डेस्क : मुंबई उत्तर पश्चिम मतदारसंघातील लोकसभा निवडणुकीत शिंदेंच्या शिवसेनेचे उमेदवार रवींद्र वायकर (Ravindra Waikar) यांच्या विजयाला आव्हान देणारी ठाकरे गटाच्या अमोल कीर्तीकर (Amol Kirtikar) यांची याचिका मुंबई उच्च न्यायालयाने गुरुवारी फेटाळून लावली. यामुळे ठाकरे गटासाठी हा मोठा धक्का मानला जात आहे. तर रवींद्र वायकर यांची खासदारकी कायम राहिली आहे.
मुंबई उत्तर पश्चिमचे शिंदे गटाचे खासदार रवींद्र वायकर यांना मुंबई उच्च न्यायालयाच्या निर्णयाने मोठा दिलासा मिळाला आहे. वायकर यांच्या खासदारकीला आव्हान देणारी शिवसेना ठाकरे गटाचे उमेदवार अमोल कीर्तीकर यांची निवडणूक याचिका मुंबई उच्च न्यायालयाने फेटाळली आहे. लोकसभा निवडणुकीच्या मतमोजणीत फेरफार करून वायकर यांना विजयी घोषित करण्यात आल्याचा कीर्तिकर यांचा आरोप आहे. वायकर यांच्या विजयाला कीर्तीकर यांनी उच्च न्यायालयात आव्हान दिले होते. त्यावर न्यायमूर्ती संदीप मारणे यांच्या एकसदस्यीय खंडपीठाने सुनावणी पूर्ण करून ११ डिसेंबर रोजी निकाल राखून ठेवला होता. वायकर यांच्या विरोधातील कीर्तीकर यांचा दावा न्यायालयाने फेटाळून लावला आहे. वायकर यांच्याकडून ४८ मतांनी पराभूत झालेल्या कीर्तिकर यांनी निवडणूक आयोगाच्या अधिकाऱ्यांवर पारदर्शकतेचा अभाव आणि मतमोजणीत त्रुटी असल्याचा आरोप केला होता. त्यांनी फेरमतमोजणीसाठी अर्ज दाखल करण्याची परवानगी दिली नसल्याचा दावा केला होता.
मुंबई उत्तर-पश्चिम लोकसभा मतदारसंघाच्या मतमोजणी अमोल किर्तीकर ईव्हीएम मतमोजणीत एका मताने आघाडीवर होते. मात्र, पोस्टल मतमोजणीत वायकर यांचा ४८ मतांनी विजय झाला. वायकर यांना ४,५२,६४४ मते आणि किर्तीकर यांना ४,५२,५९६ मते मिळाली.
