Kamala Mills: BMC चा दणका, कमला मिल्समधील टॅपरुम, टॉस पास्ता बार सील; हे आहे कारण?

मुंबई : मुंबई महानगरपालिकेच्या परवाना विभाग, प्रभादेवी जी-दक्षिण विभाग, अग्निशमन दल, आरोग्य विभाग, इमारत आणि कारखाना विभाग व अतिक्रमण हटाव विभाग यांच्या संयुक्त विद्यमाने लोअर परळ, कमला मिल्स कंपाउंडच्या आवारातील 9 हॉटेलच्या पाहणीच्या वेळी परवाना अटींचे उल्लंघन केल्याचे आढळून आल्याने 2 हॉटेल सील करण्यात आली.

कमला मिल्स आवारातील हॉटेलधारकांनी मोठ्या प्रमाणात अतिक्रमण केल्याच्या तक्रारी आल्याने अतिरिक्त महानगरपालिका आयुक्त अश्विनी जोशी, उपायुक्त प्रशांत सपकाळे आणि सहाय्यक आयुक्त जी दक्षिण स्वप्नजा क्षीरसागर यांच्या मार्गदर्शनाखाली परवाना विभागाने जी दक्षिण विभागसह अग्निशमन दल, आरोग्य विभाग, इमारत आणि कारखाने विभाग यांच्या संयुक्त विद्यमाने थियोब्रोमा रेस्टॉरंट, मॅकडोनाल्ड्स, शिवसागर हॉटेल, नॅनोज कॅफे, स्टारबक्स, बिरा टॅपरूम, देविका यांचे अन्न, मेसर्स टॅपरूम, मेसर्स टॉस पास्ता बार यांची तपासणी केली. आरोग्य विभागाने मेसर्स टॅपरूम व मेसर्स टॉस पास्ता बार यांच्यावर जप्तीची कारवाई केली.

परवाना अटींचे उल्लंघन व समोरील मोकळ्या जागांचा अनधिकृत वापर केल्यामुळे ही कारवाई करण्यात आल्याचे पालिकेकडून सांगण्यात आले. या पाहणी दौर्‍याच्यावेळी इमारत आणि कारखाना विभागाने बीकेटी हाऊससमोर पार्किंगसाठी उभारलेली अनधिकृत एम.एस. कंपाऊंड भिंत पाडण्यात आली. या भिंतीमुळे लेआउट रोड एक्झिटवर परिणाम होत होता. बिरा टॅपरूम आणि फूड बाय देविका यांच्या मोकळ्या जागेत उभारलेल्या अनधिकृत शेड आणि एम.एस. कंपाऊंड भिंत पाडण्यात आली. ही कारवाई अग्निसुरक्षा आणि इमारत नियमांचे पालन सुनिश्चित करण्यासाठी आणि व्यावसायिक क्षेत्रात सार्वजनिक सुरक्षा राखण्यासाठी करण्यात आल्याचे सांगण्यात आले.

• थियोब्रोमा रेस्टॉरंट

• मॅकडोनाल्ड्स

• शिवसागर हॉटेल

• नॅनोज कॅफे

• स्टारबक्स

• बिरा टॅपरूम

• देविका यांचे अन्न

• मेसर्स टॅपरूम

• मेसर्स टॉस पास्ता बार