मुंबई ः राष्ट्रवादीचे नेते बाबा सिद्दीकी यांच्या हत्येप्रकरणी रविवारी रात्री उशिरा पुण्यातून अटक केलेल्या प्रवीण लोणकरला न्यायालयाने 21 ऑक्टोबरपर्यंत पोलिस कोठडी सुनावली आहे. या गुन्ह्यात अटक झालेला प्रवीण हा तिसरा आरोपी असून त्याच्यासह त्याचा भाऊ शुभम लोणकरने या हत्येसाठी शस्त्रे पुरविल्याचा आरोप आहे.
या गुन्ह्यात बिष्णोई टोळीचा सहभाग असल्याचा दावा सरकारी वकिलांनी दावा केला. त्यामुळे ही हत्या बिष्णोई टोळीनेच घडवून आणल्याचे स्पष्ट झाले आहे. या हत्याकांडातील गुरमेल सिंग आणि धर्मराज कश्यप यांना आधीच बेड्या ठोकण्यात आल्या आहेत. त्यांच्या चौकशीत शिवकुमार गौतम ऊर्फ शिवा, मोहम्मद झिशान अख्तर, शुभम लोणकर, प्रवीण लोणकर ही अन्य आरोपींची नावे समोर आली होती. लोणकर बंधू पुण्यात राहात असल्याने गुन्हे शाखेचे एक पथक पुण्याला गेले होते. रविवारी रात्री उशिरा प्रवीण याला चौकशीसाठी ताब्यात घेतले.
चौकशीत प्रवीण व त्याचा भाऊ शुभम यांनीच तिन्ही मारेकर्‍यांना हत्येसाठी शस्त्रे पुरविल्याचे उघडकीस आले होते. जानेवारी महिन्यात शुभम याला घातक शस्त्रांसह पुणे पोलिसांनी अटक केली होती. याच गुन्ह्यांत तो काही महिने तुरुंगात होता. नंतर तो जामिनावर बाहेर आल्यानंतर तो जूनपासून फरारी झाला होता. दोन्ही लोणकर बंधू बिष्णोई टोळीसाठी काम करत होते असे तपासात उघडकीस आले. यानंतर प्रवीणला पोलिसांनी पुढील चौकशीसाठी मुंबईत आणले होते.
