मुंबई; पुढारी वृत्तसेवा : रस्त्यावरील नाला साफ करणाऱ्या कामगाराला कारने धडक दिल्याने कामगाराचा नाल्यात पडून मृत्यू झाल्याची घटना कांदिवली येथील डहाणूकरवाडी येथे घडली. ही खळबजनक घटना सीसीटीव्हीत कैद झाली आहे. या घटनेनंतर कामगार संविदा श्रमिक जगवीर शामवीर यादव (37) यांच्यावर पालिकेच्या डाॅ.बाबासाहेब आंबेडकर रुग्णालयात उपचार सुरु होते, मात्र उपचारादरम्यान त्यांचा सोमवारी (२६ जून) मृत्यू झाला. (Death of sanitation worker)
याप्रकरणी कारचालक आणि संबंधित कंत्राटदाराला पोलिसांनी अटक केली आहे. या घटनेमुळे एकच खळबळ माजली आहे. नालेसफाई करत असतांना कामगारांसाठी आवश्यक ती सुरक्षेची काळजी न घेतल्याने ही घटना घडली आहे. कंत्राटदाराचा निष्काळजीपणा कामगाराच्या जीवावर बेतला आहे.
पालिकेच्या सूत्रानी दिलेल्या माहितीनुसार, डहाणूकरवाडी परिसरात नाले सफाईचे काम सुरु होते. एक मजूर नाल्यात उतरुन कचरा भरत होता, तर त्याचे साथीदार कचरा फेकत होते. नाल्यात उतरलेला मजूर नाल्यातून बाहेर येत होता, इतक्यातच समोरुन आलेली भरधाव कार त्याच्या अंगावर गेली. यात तो नाल्यात पडला आणि जखमी झाला. त्याला तात्काळ जखमी अवस्थेत पालिकेच्या डाॅं. बाबासाहेब आंबेडकर रुग्णालयात नेण्यात आले. मात्र ५ दिवसानंतर त्यांचा उपचारादरम्यान मृत्यू झाला.
हेही वाचा
