Sonpeth Police Action
गंगाखेड: महामानव डॉ. बाबासाहेब आंबेडकर जयंतीच्या पार्श्वभूमीवर जिल्ह्यात कायदा व सुव्यवस्था राखण्यासाठी अवैध शस्त्रसाठ्यावर कठोर कारवाई करण्याचे आदेश देण्यात आले होते. त्या अनुषंगाने पोलिसांनी कारवाई करत एका व्यक्तीला अवैध तलवारीसह अटक केली.
सोमवारी (दि. १३) पोलीस अधीक्षक रवींद्रसिंग परदेशी आणि अप्पर पोलीस अधीक्षक सुरज गुंजाळ यांच्या मार्गदर्शनाखाली, पोलीस निरीक्षक विवेकानंद पाटील यांच्या नेतृत्वात एक विशेष पथक तयार करण्यात आले. या पथकात पोलीस उपनिरीक्षक चंदनसिंग परिहार, पोलीस हवालदार महेश कवठाळे, राहुल परसोडे, माणिक वाघ तसेच पोलीस शिपाई दिलीप निरपत्रीवार आणि शरद सावंत यांचा समावेश होता.
महातपुरी फाटा येथे गस्त घालत असताना पथकाला गोपनीय माहिती मिळाली की, महातपुरी येथील माऊली मुलगीर हा अवैध तलवार बाळगत आहे. या माहितीच्या आधारे पोलिसांनी सापळा रचून संबंधिताला ताब्यात घेतले. चौकशीदरम्यान त्याने शेतातील गोठ्यात लपवून ठेवलेली तलवार पोलिसांच्या ताब्यात दिली.
या प्रकरणी आरोपीविरुद्ध सोनपेठ पोलीस ठाण्यात गुन्हा क्रमांक १८१/२६ नोंदवून, शस्त्र अधिनियम कलम ४ व २५ अंतर्गत कारवाई करण्यात आली असून पुढील तपास सुरू आहे.
